नेपाली कांग्रेस नुवाकोटद्धारा बृद्दि गरिएको कर तत्काल फिर्ता लिन विदुर र बेलकोटगढी नगरपालिकालाई एकहप्ते अल्टिमेटम, साबिकको कर लिन माग

विदुर÷ नेपाली कांग्रेस जिल्ला कार्यसमिति नुवाकोटको आइतबार बसेको बैठकले नुवाकोटको विदुर नगरपालिका र बेलकोटगढी नगरपालिकालाई बढाइएको स्थानिय कर तत्काल फिर्ता लिन एक हप्ते अल्टिमेटम दिएको छ ।

नुवाकोटको विदुरमा बसेको बैठकले काँग्रेसको तर्फबाट निर्बाचित गाउँपालिकाका अध्यक्ष,उपाध्यक्ष र वडाअध्यक्षहरुलाई आ.ब.२०७५÷०७६ को लागि वृद्धि गरिएको करले जनताको ढाड सेकिएको भन्दै तत्काल लागु नगर्न आग्रह गरेको छ । साथै बैठकले विशेषगरि विदुर र बेलकोटगढी नगरपालिकाले लिएको कर नितिको विरोध गर्न र नगरपालिकालाई करको विषयमा असहयोग गर्न आग्रह गरिएको नेपाली कांग्रेस नुवाकोटका प्रवत्ता राजु थापाले विदुर खबरलाई बताए ।

नेपाली कांग्रेस नुवाकोटले नागरिकमाथि स्थानिय तहले वृदि गरेको कर अवैज्ञानिक र जनतालाई थला पार्ने भएको भन्दै साविकको कर लागु गर्न माग गरेको छ । कांग्रेसले बिदुर र बेल्कोटगढी नगरपालिकाले आ.ब.२०७५÷०७६मा एकसयदेखि एकहजार प्रतिशतसम्मम्म बृद्दि गरेको कर एकहप्तासम्म फिर्ता नलिए सशत्त विरोधका कार्यक्रम गर्ने नेपाली कांग्रेस नुवाकोटले जनाएको छ ।

यसअघि नगरपालिकाले बढाएको करको विषयमा विदुर नगरपालिका वडा नं ५ का स्थानियवासीले समेत विरोध जनाइसकेका छन । यो सँगै विदुर नगरपालिका केही महिना अघि बसेको नगरसभाबाट पास भएको भनिएको एकीकृत सम्पत्ति कर घटाउन दबाबमा परेको छ । एमाले निकटका केही वडाध्यक्ष समेतले नगरपालिकाले बढाएको एकीकृत सम्पत्ति करको विरोध जनाएकोले विदुर नगरपालिकाका मेयर सञ्जु पण्डित दबाबमा परेका छन ।