त्रिशूली अस्पतालमा पहिलो पटक आईसीयू सेवा सञ्चालनमा

नुवाकोट । स्थापनाको ५६ वर्षपछि जिल्ला अस्पताल त्रिशूलीमा पहिलो पटक आईसीयू सेवा सञ्चालनमा आएको छ ।

अस्पतालमा दुईवटा भेन्टिलेटरसहित ६ बेडको आईसीयू र चार बेडको एचडीयू सेवा सुरु गरेको अस्पतालका प्रमुख मेडिकल सुपरिटेन्डेन्ट डा. दीपेन्द्र पाण्डेले बताए । वाग्मती प्रदेशकी उपसभामुख राधिका तामाङले आईसीयू सेवाको मंगलबार उद्घाटन गरेकी हुन् । अस्पतालले कोरोनाका गम्भीर बिरामीलाई प्राथमिकतामा राख्दै आईसीयू सेवा दिने जनाएको छ । अस्पतालमा श्वासप्रश्वास, मुटुको समस्या भएका बिरामी, अत्यधिक ज्वरो, मेनेन्जाइटिस, इन्सेफ्लाइटिस, सडक दुर्घटनाका घाइते, जटिल सुत्केरीलगायतलाई रेफर गरेर काठमाडौं जानुपर्ने बाध्यता हटेको मेसु पाण्डेले बताए । अस्पतालमा दैनिक साढे ३ सयभन्दा बढी बिरामी आउने गर्छन् ।

प्रदेश सरकारको सामाजिक विकास मन्त्रालय मातहतमा रहेको त्रिशूली अस्पतालमा कोरियन सहयोग संस्था (कोइका) को सहयोगमा ५० शय्याको सुविधासम्पन्न अस्पताल भवन बनेको छ । अस्पतालमा रसुवा, धादिङ र नुवाकोटका बासिन्दा उपचारका लागि आउने गर्छन् ।