छैठौँ नुवाकोट महोत्सव घाटामा

नुवाकोट । नुवाकोट उद्योग वाणिज्य संघले नुवाकोटमा गत माघ १६ गतेदेखि २६ गतेसम्म संचालन गरेको छैठौँ नुवाकोट महोत्सवमा घाटामा गएको छ ।

संघले मंगलवार विदुरमा पत्रकार सम्मेलनको आयोजना गरि महोत्सवको आयव्यय सार्वजनिक गरेको हो । पत्रकार सम्मेलनमा संघका कोषाध्यक्ष दिनेश श्रेष्ठले गत वर्ष सम्पन्न भएको महोत्सवको आयव्यय सार्वजनिक गर्दै संघलाई ५ लाख ७८ हजार ८ सय ७ रुपैयाँ घाटा भएको बताए । उनले महोत्सवमा आम्दानीमार्फत ७५ लाख २५ हजार ४ सय १४ रुपैयाँ प्राप्त भएको जानकारी दिए । यस्तै खर्चतर्फ कुल ८१ लाख ४ हजार २ सय २१ रुपैयाँ खर्च भएको बताए ।

पत्रकार सम्मेलनमा दिइएको जानकारी अनुसार महोत्सवमा सबैभन्दा बढी कलाकार शीर्षकमा १८ लाख ६९ हजार रुपैयाँ खर्च भएको छ । यस्तै होटलतफ १४ लाख ४७ हजार ९ सय ५ रुपैयाँ भएको नुवाकोट उद्योग वाणिज्य संघले जानकारी दिएको छ । पत्रकार सम्मेलनमा बोल्दै संघका अध्यक्ष तारावहादुर कार्कीले सबैको सहयोगले महोत्सव सफल भएको बताए । उनले महोत्सव लगत्तै कोरोना भाइरसको संक्रमण र सरकारले गरेको लकडाउनको कारण छिट्टै आयव्यय सार्वजनिक गर्न नसकिएको बताए ।

गत वर्ष माघ १६ गतेदेखि २६ गतेसम्म धार्मिक ऐतिहासिक कला संस्कृतिको सम्वद्र्धन, दिगो आर्थिक विकासको लागि व्यवसायिक प्रर्वद्धन भन्ने मुल नाराका साथ नुवाकोटको विदुर ४ बट्टारमा छैठौ नुवाकोट महोत्सव आयोजना गरिएको थियो । महोत्सवमा २ सय ५० भन्दा बढी स्टल रहेको थियो ।