नुवाकोटको विदुर नगरपालिकामा औद्योगिक ग्राम स्थापना गरिने

नुवाकोट । नुवाकोटको विदुर नगरपालिकामा औद्योगिक ग्राम स्थापना गर्ने सरकारले निर्णय गरेको छ ।

उद्योग वाणिज्य तथा आपूर्ति मन्त्रालयको प्रस्तावमा सरकारले औद्योगिक ग्राम घोषणा गर्ने निर्णय गरेको सरकारका प्रवक्ता एवं सञ्चार तथा सूचना प्रविधिमन्त्री पार्वत गुरूङले बाग्मती प्रदेशमा नुवाकोटको विदुर नगरपालिकाको वडा नम्बर  १० को शुभघाट एरियाको कित्ता १८७ रोपनी सरकारी जग्गामा औद्योगिक ग्राम स्थापना गरिने जानकारी दिए ।

बागमती प्रदेशको राजधानी नुवाकोटलाइ बनाउने अभियानमा धक्का लागेपछि नेकपा बागमती प्रदेशका मुख्य सचेतक केशवराज पाण्डे, बाग्मती प्रदेशका सांसद बद्री मैनाली लगायतले संघीय सरकारसँग विदुरमा औद्योगिक ग्राम स्थापना गरिदिन संघीय सरकारसँग अनुरोध गरेका थिए ।

प्रकियागत रूपमा विदुर नगरपालिकाले पनि औद्योगिक ग्राम स्थापनाका लागि पहलकदमी लिएपछि गत कात्तिक अन्तिम साता बसेको मन्त्रिपरिषद्को बैठकले निर्णय गरेको थियो ।