नुवाकोटको विदुर नगरपालिका कोरोनाको हटस्पट बन्दै

नुवाकोट । नुवाकोटको विदुर नगरपालिका कोरोनाको हटस्पट बन्दै गएको छ ।

पछिल्लो दिनयता विदुर नगरपालिकामा दिनानुदिन कोरोना संक्रमितको संख्या वृद्दि हुँदै जानुले नगरपालिकाको सदरमुकाम क्षेत्र कोरोनाको हटस्पट बन्दै गएको हो । विदुर नगरपालिकाको बजार क्षेत्रहरु कोलनी,त्रिशुली,ढुङ्गे,विदुर बट्टार लगायतका स्थानमा दैनिकजसो धेरैलाई कोरोना संक्रमण भइरहेको स्वास्थ्य कार्यालय नुवाकोटले जनाएको छ ।

सोमबार मात्रै विदुर नगरपालिकाका ५३ जनामा कोरोना संक्रमण पुष्टि भएको छ । जसमा ४६ जना पुरुष र ७ जना महिला रहेका छन् । नगरपालिकाको अधिकांश भाग बजार क्षेत्रमा रहनु तथा उच्च सावधानी नअपनाउँदा बजार क्षेत्रमा कोरोना संक्रमण बढेको सरोकारवालाहरु बताउँछन् ।

यसले नगरपालिकामा भयाभय अवस्था सिर्जना हुनसक्ने भन्दै नगरपालिकाले उच्च सावधानी अपनाउनु पर्नेमा नगरपालिका भने मौन देखिएको छ । त्यस्तै बजार क्षेत्रमा भेटिएका संक्रमितहरुको कन्ट्रयाक ट्रेसिङ गर्नुपर्नेमा नगरपालिकाले हालसम्म सो काम गर्न सकेको छैन ।