विदुर नगरपालिकाको बजेट एक अर्बको हुने

विदुर खबर २०७७ असार ४ गते ९:१३

विदुर । नुवाकोटको विदुर नगरपालिकाको आर्थिक वर्ष २०७७÷७८ को बजेट एक अर्ब बराबर हुने भएको छ ।
नगरपालिकाले कृषि र स्वास्थ्यलाई प्राथमिकता दिएर बजेट निर्माणको तयारीमा रहेको जुटेको नगरपालिकाका मेयर सञ्जु पण्डितले जानकारी दिए ।

Advertisement

आगामी वर्षको नीति तथा कार्यक्रम यही असार १० गते ल्याउने तयारीमा नगरपालिका जुटिरहेको छ । विशेषगरी कोरोना भाइरसका कारण परेको प्रभाव र भित्रिएका जनशक्तिको व्यवस्थापनको क्षेत्रमा बजेट विनियोजन हुने बताइएको
छ । स्थानीय तहको राजस्व सङ्कलनमा आएको गिरावट र भाइरसको प्रभावका कारण विकास निर्माणभन्दा कृषि, पशु तथा स्वास्थ्य क्षेत्रले प्राथमिकता पाउने नगरपालिकाले जनाएको छ । भाइरसका कारण सबै क्षेत्र प्रभावित भए तापनि
सुधारोन्मुख प्रक्रियामा नगरपालिका जाने नगरप्रमुख पण्डितले बताए ।

विदेशबाट फर्किएर आएका नागरिकको सीप र दक्षतालाई समुदायमा परिचालन गर्ने, स्थानीय उद्योग र हस्तकलालाई प्रमोट गर्ने, स्थानीय उत्पादनको बजारीकरण गर्ने, समुदाय सबलीकरण कार्यक्रम सञ्चालन गर्ने योजना ल्याउनेबारे नगरपालिकाले
छलफल गरिरहेको छ । विगतका दिनमा मोटरबाटो र भौतिक संरचना निर्माणले पाउँदै आएको प्राथमिकता यस वर्षबाट तोडिने नगरप्रमुख पण्डितले बताए । साना तथा टुक्रे आयोजनालाई निस्तेज गर्दै ठूला र विकासमुखी योजना मात्रै सञ्चालन गर्ने उनले बताए ।

Advertisement

नगरपालिकाले आर्थिक वर्ष ०७७÷७८ को बजेट निर्माणका लागि विषयगत विज्ञसँग परामर्शसमेत गरिरहेको छ । शिक्षा, स्वास्थ्य, भौतिक पूर्वाधार, सिँचाइ तथा जलस्रोत व्यवस्थापनलगायतका विज्ञहरूसँग समन्वय गरिरहेको विदुर नगरपालिकाले जनाएको छ । आक्रामक विकासका लागि थोरै, तर दिगो विकासमा नगरपालिका अगाडि बढेको उपप्रमुख गीताकुमारी दाहालले बताएकी छिन् ।

प्रतिक्रिया