त्रिशूली अस्पताललाई दरबन्दी र स्वास्थ्य सामग्री अभाव

विदुर÷ नुवाकोटमा कोरोना भाइरसको सङ्क्रमित बढ्दै जाँदा कोरोना सङ्क्रमितको उपचार गर्ने त्रिशूली अस्पतालमा स्वीकृत दरबन्दी र स्वास्थ्य सामग्री तथा आवश्यक औषधिको अभाव रहेको छ ।

जिल्लामा बुधबारसम्म कोरोना सङ्क्रमितको सङ्ख्या १३ जना पुगेको छ । कोरोना सङ्क्रमित तीनजना त्रिशूली अस्पतालमा उपचारपछि मंगलबार घर फर्किएका छन् । पछिल्लो समय जिल्लामा कोरोना सङ्क्रमितको सङ्ख्या बढिरहेको स्वास्थ्य कार्यालयले जानकारी दिएको छ । सङ्क्रमण पुष्टि भएको नौजनाको त्रिशूली अस्पतालमा र एकजना खरानीटार अस्पतालमा रहेको आइसोलेसन वार्डमा राखी उपचार भइरहेको छ । कोरोना सङ्क्रमित बढ्ने क्रम बढे पनि उपचारका लागि आइसोलेसन वार्डको अभाव देखिएको छ ।

त्रिशूली अस्पतालले प्रदेश सरकार र जिल्लामा स्थानीय निकायको आर्थिक सहयोगमा १० बेडको आइसोलेसन वार्ड थप्ने तयारी गरिरहेको छ । बेडसङ्ख्या थप्न सकिने भए पनि स्वीकृति ५० बेडको त्रिशूली अस्पताललाई स्वीकृति ५८ जना दरबन्दी पूरा नहुँदा उपचार सेवा दिन सकिरहेको छैन । अस्पतालमा छात्रवृत्तिका करार केही डाक्टर र दुईजना विशेषज्ञ डाक्टर मात्र कार्यरत रहेका छन् । सरुवा भएर जाने, तर नआउने कारणले स्वास्थ्यकर्मीको अभाव भएको अस्पताल विकास तथा व्यवस्थापन समितिका अध्यक्ष अर्जुनप्रसाद न्यौपानेले  बताए । कोरोना सङ्क्रमित यही क्रममा जिल्लामा थपिँदै जाने हो भने त्रिशूलीअस्पतालले थेग्न नसक्ने उनले बताए । स्वास्थ्यकर्मीलाई आइसोलेसनमा खटाउँदा १४ दिन क्वारेन्टाइनमा राख्नुपर्ने भएकाले अस्पतालको अन्य सेवा सञ्चालन गर्न स्वास्थ्यकर्मीको अभाव देखिएको छ । करारको डाक्टरले धानेको अस्पतालको
सेवा नियमित गराउन धौ–धौ परिरहेको अध्यक्ष न्यौपानेले बताए ।

अस्पताल विकास समितिसँग बजेटको समेत अभाव रहेको छ । कोरोना सङ्क्रमितको उपचारमा खटिएका स्वाथ्यकर्मीको बिमा र उत्प्रेरणा तथा जोखिम भत्तासमेत अस्पतालले दिन सकेको छैन ।