लकडाउनकै बीच राजदूत पाण्डेलाई बधाई थाप्न भ्याइनभ्याइ

नुवाकोट ।  देश लकडाउनमा रहेकै बेला चीनका लागि नवनियुक्त राजदूत महेन्द्र बहादुर पाण्डेको व्यस्तता बढेको छ ।

छ्ट्टिै राजदूतको जिम्मेवारी सम्हाल्न चीन जान तरखरमा रहेका उनलाई बधाइ दिनका लागि धमाधम कार्यक्रम राख्न थालिएपछि लकडाउनकै बीच पनि उनको व्यस्तता बढेको हो ।  यही सातामात्रै उनी दुई वटा कार्यक्रममा सक्रिय भएका छन् । आइतबार नुवाकोट सरोकार मन्चले आयोजना गरेको बधाइ तथा शुभकामना कार्यक्रममा सहभागी भएका उनी मंगलबार पनि नुवाकोट जिल्ला पार्टीको आयोजनामा भएको कार्यक्रममा सहभागी भएका हुन् ।

राजधानीमै भएको दुबै कार्यक्रममा उनलाई नुवाकोटका जिल्लास्तरीय देखि केन्द्रसम्म प्रतिनिधित्व गर्ने नेता तथा शुभेच्छुक सहभागी रहेका थिए । लकडाउनमा सामाजिक दूरी कायम गर्न तथा कार्यक्रम हरु नगर्न रोक लगाइएपनि उनी  त्यस्ता कार्यक्रममा उनी सहभागी भएका हुन् ।  नेकपाका नेता समेत रहेका पाण्डेलाई गत वैशाख ५ गते राष्ट्रपति विद्यादेवी भण्डारीले संविधानको धारा २८२ बमोजिम मन्त्रिपरिषद्को सिफारिसमा चीनका लागि नेपालको आवासीय राजदूतमा नियुक्त गरेकी थिइन् । तर लकडाउनकै कारण उनी जिम्मेवारी सम्हाल्न बेइजिङ जान भने पाएका छैन ।

यद्यपी उनी केही दिनभित्रै चीन जाने तयारीमा रहेका बुझिएको छ । जाने अन्तिम तयारीमा लागेकाले नै उनलाई बधाइ दिन विभिन्न संघसंस्थाहरुले कार्यक्रमकाे आयाेजना गर्ने क्रम बाक्लिएको हाे ।