त्रिशुली बजारलाई छोएन लकडाउनले

त्रिशुली । कोरोना भाइरसको संक्रमण बढेको भन्दै केन्द्र सरकारले लकडाउन घोषणा गरेको ५१ दिन बितेको छ ।

तर नुवाकोटको त्रिशुली बजारलाई भने लकडाउन भएको लामो समय बितिसक्दा पनि छुन सकेको छैन । सरकारले अत्याआवश्यक काम वाहेक घर वाहिर ननिस्कन र अत्याआवश्यक वाहेकका सबै उद्योग,कलकारखाना, पसल बन्द गर्न भनेपनि त्रिशुली बजार क्षेत्रका पसलहरु निर्वाध रुपमा चलिरहेका छन । त्रिशुली बजारमा रहेका फलफुल तथा तरकारी पसलमा दैनिक वारा,पर्सा, लगायत तराईका विभिन्न स्थानबाट निर्वाध रुपमा तरकारी र फलफुल भित्रिदा समेत सम्बन्धित निकाय मौन रहेका छन । बजार क्षेत्रमा दैनिक तराईबाट फलफुल र तरकारी निर्बाध रुपमा भित्रिदा पनि सरोकारवाला मौन रहेको भन्दै स्थानियबासीहरु असन्तुष्टि व्यक्त गरेका छन ।

तराईका विभिन्न जिल्लाहरु कोरोनाको हटस्पट बनिरहँदा त्यहाँबाट दैनिक रुपमा नुवाकोटमा तरकारी,फलफुल र खाद्यान्नहरु भित्रिरहेका छन त्यसलाई रोक्न कसैले पहल गरेको छैन स्थानिय लिडर श्रेष्ठले भने । अहिलेको समयमा पनि सरोकारवाला निकायले ध्यान नदिँदा रोगको संक्रमण बढ्ने जोखिम बढेको उनले बताए । यो खेलवाड र हुलहुज्जत गर्ने वेला हैन भिडभाड रोक्न प्रहरी प्रशासनलाई सबैले सहयोग पुराएमा सहज हुने उनको धारणा छ ।

त्यस्तै विदुर नगरपालिका वडा नम्बर १ का वडाध्यक्ष लेनिन रञ्जितले भोलिबाट वडा नम्बर १ का कुनैपनि पसलहरु खोल्न नपाइने बताए । बजारलाई विहान र वेलुका समय मिलाएर खोल्ने व्यवस्था मिलाइने उनको भनाई छ । वडाध्यक्ष रञ्जितले बजार व्यवस्थित गर्न पहल गरिरहेको र कोरोनाले यो वा त्यो नभन्ने भन्दै बजार व्यवस्थित रुपमा संचालन गर्न सबै सरोकारवाला निकाय जिम्मेवार हुनुपर्ने जानकारी दिए ।

त्यस्तै त्रिशुली बजारका फलफुल व्यापारीहरुले भने फलफुल छिटो बिग्रने संभावना भएकोले आफुहरु घाटा खाएर व्यापार गर्न नसक्ने बताउँछन । देशभर कोरोना संक्रमतिको २ सय १९ जना पुगिसकेको अवस्थामा सरकार, स्थानिय जनप्रतिनिधि र सबैले बेलैमा सोच्न जरुरी छ ।