विदुर नगरपालिकका ८० वृद्धवृद्धा सम्मानित

विदुर । समाज सचेतन केन्द्र विदुरले आफ्नो २० औ वार्षिकउत्सवको अवसर पारेर विदुर नगरपालिका भित्रका ८० जना वृद्धवृद्धालाई सम्मान गरेको छ ।

शुक्रवार विदुरमा एक कार्यक्रमको आयोजना गरि केन्द्र नगरपालिकाका ७५ वर्षभन्दा माथिका ८० जना वृद्धवृद्धालाई सम्मानसहित एक÷एक ओटा थर्मस समेत वितरण गरेको समाज सचेतन केन्द्रका अध्यक्ष यमकुमार खातीले जानकारी दिए । समाजको विभिन्न तह र तप्कामा योगदान पुराएको र अन्य संघसंस्थालाई पनि वृद्धवृद्धाहरुलाई सम्मान र प्रोत्साहन गर्न सम्मान गरिएको खातीले बताए ।

कार्यक्रममा नेकपाका नेता राजेन्द्र प्रकाश लोहनीले समाजमा रहेका सबै वृदवृद्धा नागरिकहरुको हेरचाह गर्ने जिम्मा सरकारको भएपनि अहिले सरकारको आम्दानी कम भएकोले जिम्मा पुरा गर्न नसकेको बताए । सरकार सक्षम भएपछि सबैको शिक्षा, स्वास्थ्य, औषधी उपचार लगायतका कुराहरुमा राज्यले जिम्मा लिने लोहनीले बताए ।

त्यस्तै कार्यक्रममा पुर्व सांसद गोविन्द नेपाली, विदुर नगरपालिका वडा नम्बर ४ का वडाअध्यक्ष टलकमान श्रेष्ठ, समाज सचेतन केन्द्रका सल्लाहकार इन्द्र पण्डित लगायतले समाजमा रहेका वृद्धवृद्धाहरु जीउँदो इतिहास भएकोले उनीहरुबाट युवापुस्ताले धेरै कुरा सिक्न सक्ने बताए । वि.स २०५६ साल मंसिर २७ गते स्थापना भएको समाज सचेतन केन्द्रले आन्तरिक स्रोतबाट वृद्धवृद्धाहरुलाई सम्मान गरेको जनाएको छ ।