नुवाकोट पहिरोको उच्च जोखिममा, किस्पाङ डेन्जर जोनमा

नुवाकोट । नुवाकोट सबै भु–भाग पहिरोको उच्च जोखिममा रहेको पाइएको छ ।

बट्टारमा मंगलबार आयोजना गरिएको ‘पहिरोको जोखिम पहिचानमा नक्साको उपयोग’ अभिमुखीकरण कार्यक्रममा सो कुराको जानकारी दिइएको हो । कार्यक्रममा नुवाकोटका २ नगरपालिका सहित १० वट्टै गाउँपालिका पहिरोको उच्च जोखिममा रहेको प्राध्यापक डाक्टर मेघराज धितालले बताए । नुवाकोटमा रहेका १२ ओटा स्थानिय तहमध्ये किस्पाङ गाउँपालिका सबैभन्दा बढी जोखिममा रहेको कार्यक्रममा जानकारी दिइएको थियो ।

कार्यक्रममा नुवाकोटका प्रमुख जिल्ला अधिकारी द्रोण पोखरेलले नुवाकोट पहिरोको उच्च जोखिममा रहेको भन्दै विकास निर्माणका काम गर्दा सावधानी अपनाउनुपर्ने बताए । त्यस्तै विदुर नगरपालिकामा प्रमुख सञ्जु पण्डितले विपत व्यवस्थापनको अधिकार स्थानिय तहमा आएको भन्दै सबै स्थानिय तहले विकास निर्माणको काम गर्दा भौगोलिक अवस्था हेरेर मात्र गर्नुपर्ने बताए । कार्यक्रममा विभिन्न सरकारी कार्यालयका प्रमुख तथा प्राविधिकहरुको उपस्थिति रहेको थियो ।