कांग्रेस संसदीय दलको नेता चयन प्रक्रिया स्थगित

नुवाकोट । कांग्रेस संसदीय दलको नेता चयन प्रक्रिया स्थगित गरिएको छ ।

पार्टीको केन्द्रीय कार्यसम्पादन समितिको बैठकले सर्वसम्मत रूपमा नेता चयन गर्नभन्दै निर्देशन दिएपछि शुक्रबारका लागि तय गरिएको सो प्रक्रिया स्थागित गरिएको हो ।

पार्टी केन्द्रीय कार्यसम्पादन समितिको निर्णय र निर्देशनअनुसार सो निर्वाचन प्रक्रिया स्थगित गरिएको निर्वाचन समितिका संयोजक प्रकाश रसाइलीले जानकारी दिए ।

दलको नेता शनिबार साँझसम्म सर्वसम्मत रूपमा तय गर्नका लागि उपसभापति विश्वप्रकाश शर्माको संयोजकत्वमा उपसभापति पुष्पा भुसाल, महामन्त्रीद्वय प्रदीप पौडेल र गुरुराज घिमिरे अनि निर्वाचन समितिको समेत सहभागिता रहने गरी कार्यदल पनि गठन गरिएको पनि रसाइलीले जानकारी दिए ।

पार्टीको बृहत्तर हित, लोकतन्त्र, संविधान र पार्टीमाथि आएका चुनौतीको सामना गर्न पनि संसदीय दलको नेता सर्वसम्मत रूपमा चयन गर्नुपर्ने भएकाले हाललाई निर्वाचन प्रक्रिया स्थगित गरिएको कांग्रेस संसदीय दलले जनाएको छ ।

सभापति गगनकुमार थापाले मोहन आचार्य र उपसभापति शर्माले भीष्मराज आङ्देम्बेलाई दलको नेताका रूपमा अघि सारेका छन् ।

त्यस्तै अर्का सांसद अर्जुननरसिंह केसीले पनि सहमतिमा नभए आफू संसदीय दलको नेतामा उम्मेदवारी दिने जानकारी नेताहरूलाई गराएपछि कांग्रेसमा दलको नेता चयन प्रक्रिया पेचिलो बन्न गएको हो ।