दुईसय किलो गाँजासहित धादिङका दुईजना पक्राउ

नुवाकोट । प्रहरीले बाराबाट दुईसय किलो गाँजासहित धादिङका दुई जनालाई पक्राउ गरेको छ ।

बाराको सिम्रौनगढ नगरपालिका वडा नम्बर ५ ठुलो ईट्टवालबाट अवैध लागू औषध गाँजा २ सय १ किलोग्राम सहित २ जनालाई शुक्रबार राति पक्राउ गरेको छ ।

पक्राउ पर्नेहरूमा धादिङ निलकण्ठ नगरपालिका–८ बस्ने २२ वर्षीय सुजन अधिकारी र धादिङ ज्वालामुखी गाउँपालिका–१ बस्ने २३ वर्षीय रमेश नेपाली रहेका छन् ।

विशेष सूचनाको आधारमा इलाका प्रहरी कार्यालय सिम्रनगौढबाट खटिएको प्रहरीले सिम्रौनगढ नगरपालिका–५ ठुलो ईट्टवाल बस्ने मनोज कुमार साहको घरमा लुकाई छिपाई राखेको उक्त परिमाणको गाँजासहित उनीहरूलाई पक्राउ गरेको हो ।

साथै प्रहरीले लागूऔषध ओसारपसारमा प्रयोग गरेको बागमती प्रदेश ०१–०२९ च ६७५२ नम्बरको पिकअप गाडी समेत बरामद गरेको छ । प्रहरीले हाल फरार मनोजको खोजी गरिरहेको छ ।