तारकेश्वरको सबै वडामा निशुल्क आँखा शिविर संचालन गर्दै घिमिरे

नुवाकोट । नुवाकोटको तारकेश्वर गाउँपालिका वडा नम्बर १ कात्तिके घर भएका सुदिप घिमिरेले आफ्नै व्यत्तिगत खर्चमा आफ्नो पालिकाको सबै वडामा निशुल्क आँखा शिविर संचालन गरिरहेका छन् ।

दृष्टि आँखा केन्द्र कलंकीको प्राविधिक सहयोगमा यही साउन ५ गतेदेखि वडा नम्बर ६ बाट शुरु भएको निशुल्क आँखा जाँच कार्यक्रम बिहिवार वडा नम्बर ४ सम्म आईपुग्दा एकसय जनाभन्दा बढीले सेवा लिइसकेका छन् ।

अहिलेसम्म वडा नम्बर ५ र ६ गरि दुई स्थानमा भएको शिविरमा एकसय भन्दा बढीको आँखा चेक जाँच गरिएको दृष्टि आँखा केन्द्र कलंकीका दृष्टि विशषेज्ञ डाक्टर राजेश कुमार चौरासियाले जानकारी दिए । आँखा चेक जाँच गर्दा २२ जना मोतियाबिन्दुका विरामी फेला परेका छन् भने आँखा पाक्ने रोगका १० जना विरामी भेटिएका छन् ।

त्यस्तै सुगरका कारण आँखामा असर परेका विरामीहरु तथा जलविन्दुको विरामी समेत फेला परेका छन् । यस्तै छड्के आँखाका २ जना विरामी फेला परेको दृष्टि विशशेष डाक्टर चौरासियाले जानकारी दिए ।

पालिकामा भेटिएका सबै मोतियाबिन्दुका विरामीहरुलाई एकमुष्ट रुपमा दृष्टि आँखा केन्द्र कलंकीमा लगेर अप्रेसनको व्यवस्था मिलाइदिने समाजसेवी सुदिप घिमिरेले जानकारी दिए । दृष्टि आँखा केन्द्र कलंकीमा मोतियाबिन्दुको अप्रेसनको खर्च विरामी स्वयमले व्यहोर्नु पर्ने तथा यातायात र खानेवस्नेको व्यवस्था आफुले गर्ने प्रबन्ध मिलाएको घिमिरेले विदुर खबरलाई जानकारी दिए ।

घिमिरेकै व्यक्तिगत सहयोगमा तारकेश्वर गाउँपालिकाको वडा नम्बर ४ को नेवारपानीमा साउन १२ गते शुक्रवार, बुधसिंहघाटमा १३ गते, वडा नम्बर २ को वडा कार्यालय र ठुलेटारमा १९ र २० गते तथा वडा नम्बर ३ को कार्यालयमा २६ गते र वडा नम्बर १ को कार्यालयमा २७ गते निशुल्क आँखा शिविर हुने बताइएको छ ।