रसुवामा मतगणनास्थल तयार

रसुवा । प्रतिनिधिसभा तथा प्रदेशसभा निर्वाचनको मतगणना गर्न रसुवामा मतगणनास्थल तयार पारिएको छ ।

जिल्ला समन्वय समितिको कार्यालयमा मतगणनाका लागि मतगणनास्थल तयार पारिएको हो । मतगणना स्थलमा तारजाली लगाएर व्यवस्थित गरिएको छ । स्थानिय तह निर्वाचनको मतगणना पनि उक्त स्थानमा गरिएको थियो । सोही समयमा राखिएको तारजालीलाई अहिले प्रयोग गरिएको मुख्य निर्वाचन अधिकृतको कार्यालय बताएको छ ।

मतगणनास्थलमा सीसी क्यामेरा जडान गरिएको छ । सुरक्षाका लागि आवश्यक मात्रामा सामग्री र सुरक्षा व्यवस्था मिलाइएको छ । उम्मेदवार र दलका प्रतिनिधि बस्ने ठाउँ, सूचना कक्ष समेत निर्माण गरिएको छ ।

हिमाली जिल्ला रसुवामा मतगणनास्थलमा जाडो हुने भएकाले हिटरको समेत व्यवस्था गरिएको छ । मतगणनास्थलमा एक प्रतिनिधिसभा र दुई प्रदेशसभाको मतगणना गरिनेछ ।

मतगणनास्थलमा सीसी क्यामेरा जडान गरिएको मुख्य निर्वाचन अधिकृत रामचन्द्र पौडेलले बताए । मतगणनास्थल शनिबार सम्पूर्ण तयारी गरिएको उनले बताए ।