आगामी निर्वाचनमा पुरुषलाई समानुपातिक सांसद बनाऔं : पाण्डे

नुवाकोट ।  आगामी प्रदेश र संघको निर्वाचनमा महिलालाई प्रत्यक्षबाट बढी उम्मेदवार बनाउन माग गरिएको छ। राजनीतिक दलका महिला नेतृहरुले निर्वाचनमा समावेशी सिद्धान्तका आधारमा समानुपातिक सहभागिता गराउन जोड दिएका छन्।

अघिल्ला निर्वाचनमा प्रत्यक्षतर्फ महिला सांसद चुनिन नसक्नु राजनीतिक दलहरुले महिलाप्रति विश्वास गर्न नसक्नुको परिणाम भएको महिला सांसदहरुको गुनासो छ।

महिलालाई प्रत्यक्षतर्फ प्रतिस्पर्धा गराएर पुरुषलाई समानुपातिकतर्फ ल्याउनुपर्नु उनीहरुको माग छ। नेकपा एमालेकी सांसद विन्दा पाण्डेले संविधानको माग परिपूर्ति गर्नुपरेका कारण मात्रै महिलालाई समानुपातिक निर्वाचन प्रणालीमार्फत अवसर दिइएको गुनासो गरिन्। उनले अझै पनि राजनीतिक दलहरुले प्रत्यक्षमा महिलालाई विश्वास गरेर उम्मेदवार बनाउन नसकेको दाबी गरिन्।

महिलालाई समानुपातिक नभइ प्रत्यक्ष निर्वाचन प्रणालीतर्फ उम्मेदवार बनाउन र जित सुनिश्चित गर्न आवश्यक रहेको उनको भनाइ छ। पाण्डेले प्रत्यक्षबाट महिलाको उम्मेदवारी सबैभन्दा बढी दिएर महिला निर्वाचित गराएमात्र समानुपातिक निर्वाचन प्रणालीबाट महिलाको संख्या घट्ने बताइन्।

पाण्डेले हरेक दलका महिला नेतृहरुले आफूले प्रतिस्पर्धा गर्ने निर्वाचन क्षेत्रबाट लड्छु भनेर दाबी गर्नुपर्ने बताइन्। अहिले हुने निर्वाचनमा कम्तिमा पनि ५० प्रतिशत वा समानुपातिक महिला उम्मेदवारी दिने कुरा अहिलेका राजनीतिक दलहरुले गर्नुपर्ने उनले माग गरिन्।

उनले संविधान रक्षाका लागि बनेको दाबी गर्दै आएको गठबन्धनको सरकारले साँच्चीकै संविधान रक्षा गर्ने हो भने संविधानले व्यवस्था गरेअनुसार ५० प्रतिशत सिटमा महिलालाई उम्मेदवार बनाउनुपर्ने बताइन्। एक तिहाई निर्वाचन क्षेत्र आरक्षण वा समानुपातिक उम्मेदवार दुईमध्ये एकमा जानुपर्ने उनको भनाइ छ।

अहिले यो असम्भव बताइए पनि सरकारले जोडबल गर्ने हो भने फास्टट्रयाबाट काम गर्न सकिने उनले बताइन्।