पहिरोले रसुवागढी नाका जोड्ने सडक दुई दिनदेखि बन्द

रसुवा । चीनसँगको अन्तर्राष्ट्रिय व्यापारिक नाका रसुवागढी जोड्ने सडक बिहिबारदेखि अवरुद्ध भएको छ ।

धुन्चेदेखि रसुवागढीसम्म विभिन्न स्थानमा गएको पहिरोको कारण सडक अवरुद्ध भएको हो । जिल्ला प्रहरी कार्यालय रसुवाका अनुसार कालिकास्थान धुन्चे सडक खण्ड अन्तर्गत मुलखर्कमा पहिरो गएको छ ।

यस्तै धुन्चे स्याफ्रु सडकखण्ड अन्तर्गत विभिन्न स्थानमा गएको पहिरोको कारण साना गाडी मात्र सञ्चालन भइरहेको छ । यस्तै स्याफ्रु रसुवागढी सडक खण्डमा अन्तर्गत लिङलिङमा झरेको पहिरो पन्छाउने काम दुई दिनदेखि जारी छ ।

अस्ती ब्लाष्टिङ गरेर ठुलो ढुंगा फुटाइएको भएपनि हटाउने काम हिजो आधा मात्र सकिएको र बाँकी आज पन्छाउने प्रहरी नायव उपरीक्षक देवेन्द्र पाण्डेले बताउनुभयो ।

सडक खुलाउनका लागि समन्वय गरिरहेको उहाँको भनाइ छ ।