प्रधानमन्त्री ओलीद्धारा मन्त्रिपरिषद विस्तार, जसपाबाट दुई राज्यमन्त्री सहित १० जना थपिए

नुवाकोट । प्रधानमन्त्री केपी शर्मा ओलीले मन्त्रिपरिषद पुनर्गठन गरेका छन् । जनता समाजवादी पार्टीको महन्थ ठाकुर र राजेन्द्र महतो पक्ष सरकारमा सहभागी हुनेभएपछि ओलीले मन्त्रिपरिषद पुनर्गठन गरेका हुन् ।

राजेन्द्र महतो नेतृत्वमा जसपा सरकारमा सरकारमा सहभागि भएको छ । महतोले उपप्रधान तथा शहरी विकास मन्त्री जिम्मेवारी सहित सरकारमा सहभागि भएका हुन् ।

शरदसिंह भण्डारीले उर्जा, जलस्रोत तथा सिचाई मन्त्रालय, अनिल झाले खानेपानी र लक्ष्मणलाल कर्णले भूमि व्यवस्था, सहकारी तथा गरिबी निवारण मन्त्रालय, विमल श्रीवास्तवले श्रम, रोजगार तथा सामाजिक सुरक्षा, उमाशंकर अरगरियाले वन तथा वातावरण मन्त्रालय, चन्दा चौधरीले महिला, बालबालिका तथा जेष्ठ नागरिक र एकवाल मियाले युवा तथा खेलकुद मन्त्रालयको जिम्मेवारी पाएका छन् ।

यस्तै चन्द्रकान्त चौधरी उर्जा जलस्रोत तथा सिचाई राज्यमन्त्री र रेनुका गुरुङ महिला बालबालिका तथा जेष्ठ नागरिक राज्यमन्त्री नियुक्त भएका छन् ।

यस्तै प्रधानमन्त्री ओलीले अहिले मन्त्रिपरिषदमा रहेका मन्त्रीको जिम्मेवारी हेरफेर गरेका छन् । प्रधानमन्त्रीले यसअघिका चार जनाबाहेक एमालेका सबै मन्त्रीहरूलाई हटाएका छन् ।

उनले अर्थमन्त्री बिष्णु पौडेल, शिक्षा मन्त्री कृष्णगोपाल श्रेष्ठ, कानुन मन्त्री लीलानाथ श्रेष्ठ, भौतिक पूर्वाधार मन्त्री बसन्त नेम्वाङबाहेक पद मुक्त गरेर रघुवीर महासेठ र शेरबहादुर तामाङलाई मन्त्रि नियुक्त गरेका छन् । महासेठलाई परराष्ट्रमन्त्री र तामाङलाई स्वास्थ्यमन्त्री बनाएका हुन् ।

राजेन्द्र महतोसंगै अर्थमन्त्री बिष्णु पौडेल र रघुवीर महासेठलाई प्रधानमन्त्री ओलाले उपप्रधानमन्त्री बनाएका छन् ।

नयाँ मन्त्रीहरूको सपथ आज बेलुकी ८ बजे हुने राष्ट्रपति कार्यलयले जनाएको छ ।