नुवाकोटमा म्याद गुज्रेको सामान भित्राउँदै पोके व्यापारी

नुवाकोट । नुवाकोटमा म्याद गुर्जेको सामान लिएर बेच्न हिँडेका पोके व्यापारीहरु धमाधम पक्राउ पर्न थालेका छन् ।

मंगलवार नुवाकोट उद्योग वाणिज्य संघका पदाधिकारी र विभिन्न स्थानिय व्यवसायिको टोलीले जिल्लाको विभिन्न स्थानमा सामान बेच्न आएका पोके व्यापारीको सामान अधिकांश रुपमा म्याद गुज्रेको अवस्थामा भेटेका छन् । पोके व्यापारीबाट करिव ३ गाडी सामान म्याद गुज्रेको अवस्थामा फेला पारिएको हो

पोक व्यापारीलाई चेकजाँच गर्दा स्निकर्स चकलेट, ओरियो बिस्कुट, प्रिङ्गल्स चिप्ससहित बजारमा नियमित प्रयोगमा रहेका आधा दर्जन खाद्य वस्तुको म्याद सकिएको अवस्थामा भेटिएको नुवाकोट उद्योग वाणिज्य संघका वरिष्ट उपाध्यक्ष गिता अमात्यले जानकारी दिए ।

उनले पोके व्यापारीले ल्याएका सामानहरु गुणस्तर नहुनका साथै म्याद गुज्रेको अवस्थामा भेटिने गरेको गुनासो आएपछि चेकजाँचको क्रममा करिव एकदर्जन सामानहरु म्याद सकिएको अवस्थामा भेटिएको हो । पोके व्यापारीले विना दर्ता प्रमाण सामान बेच्ने गर्दा वास्तविक व्यवसायि मर्कामा पर्ने गरेको अमात्यले जानकारी दिए ।

उनले पहिलो पटक म्याद गुज्रेको सामान भेटिएका व्यापारीहरुलाई सम्झाएर फर्काएको बताए । आगामी दिनमा त्यस्ता सामान भेटिएमा प्रहरी प्रशासनको जिम्मा लगाउने सर्तमा उनीहरुलाई काठमाण्डौ फर्काइएको छ ।