रोजगारीबाट घर फर्किने नेपालीमार्फत सुन तस्करी

काठमाडौं, ५ वैशाख– सुन तस्करहरुले वैदेशिक रोजगारीमा गएका नेपालीलाई समेत तस्कर बनाउन थालेका छन् ।

वैदेशिक रोजगारीमा गएर घर फर्किन लागेका नेपालीमार्फत तस्करहरुले सुन तस्करी गराउन थालेका हुन् ।

घर फर्किन लागेका नेपाली कामदारलाई बाटो खर्चसहित केही रकम दिएर तस्करहरुले सुन नेपाल पुर्याउन लागेका छन् ।

प्रहरीले विदेशबाट काम गरेर स्वदेश फर्किएका नेपालीलाई तस्करीको सुनसहित पक्राउ गरेपछि यस्तो रहस्य खुलेको हो ।

वैदेशिक रोजगारीबाट फर्किएका नेपालीमार्फत सुन तस्करी हुने गरेको गोप्य सूचनाका आधारमा प्रहरीले मंगलवार छड्के जाँच गर्दा ३ जनालाई व्यक्तिलाई अवैध रुपमा नेपाल भित्र्याइएको सुनसहित पक्राउ गरेको छ ।

महानगरीय प्रहरी बृत्त कोटेश्वरका इन्सिपेक्टरको नेतृत्वमा प्रहरीले मंगलबार कोटेश्वर चोकमा चेकजाँच गरेको थियो । चेकजाँचका क्रममा स २ प ४०२८ नम्बरको मोटरसाइकलमा सवार व्यक्तिको साथबाट ५०–५० ग्रामको ४ वटा चुरा र चेकिङकै क्रममा मोटरसाइकल चालकको सम्पर्कमा आएका अर्का व्यक्तिबाट ५० ग्रामकै अर्को सुनको बाला बरामद गरिएको प्रहरीले जनाएको छ ।

सुनसहित पक्राउ पर्नेमा काठमाडौंका ठहिटि बस्ने ३६ वर्षीय रतनलाल श्रेष्ठ, उजयपुर घर भइ बौद्ध बस्ने २२ वर्षीय लिला कुमारी श्रेष्ठ र सिराहको लहान स्थायी घर भएका इन्द्र सदे रहेका प्रहरीले जनाएको छ ।