सरकारले स्थानीय तहसँग माग्यो कर्मचारीको विवरण

१९ चैत, काठमाडौं । कर्मचारी व्यवस्थापनमा अन्योल भएपछि सरकारले स्थानीय तहसँग विवरण माग गरेको छ । संघीय मामिला तथा सामान्य प्रशासन मन्त्रालयले देशभरका ७७ वटा जिल्ला समन्वय समितिसहित सबै स्थानीय तहसँग कर्मचारी विवरण माग गरेको हो ।

स्वीकृत अन्तरिम दरबन्दी अनुरुप सम्बन्धित स्थानीय तहमा कार्यरत् निजामति कर्मचारी र साविकका स्थानीय निकायका स्थायी कर्मचारीको रिक्त तथा पूर्तिको विवरण पठाउन मन्त्रालयले आग्रह गरेको हो । बिहीबारसम्म कर्मचारी विवरण पठाउन आग्रह गरेको छ ।

बुधबार मन्त्रिपरिषद्को बैठकले स्थानीय तहमा आवश्यक कर्मचारीको अन्तरिम दरबन्दी स्वीकृत गरेको थियो ।

सरकारले नयाँ संगठन संरचना अनुसार ३७ हजार सात सय ९६ कर्मचारी दरबन्दी व्यवस्थापन गर्ने निर्णय गरेको थियो ।

हाल विभिन्न विषयगत कार्यालय अन्तर्गतका केन्द्र/उपकेन्द्रमा खटिने कर्मचारी १९ हजार पाँच सय ५८ समेत गरी स्थानीय तहमा कुल ५७ हजार ३५४ दरबन्दी तोकिएको छ ।