नुवाकोटको सिसडोलमा प्रहरी र स्थानीवासीबीच झडप, ठूलो संख्यामा स्थानीवासी घाइते

नुवाकोट असार १४, प्रहरी र स्थानीयवासीबीच झडप हुँदा ओखरपौवाको सिसडोलमा ठूलो संख्यामा स्थानीयवासी घाइते भएका छन् भने केही प्रहरी अधिकारीहरु पनि घाइते भएका छन् ।

आफुहरुको न्यूनतम माग पूरा नगरी काठमाडौंको उपत्यकाको फोहर फ्याल्न नदिने अडानमा रहेका सिसडोलवासी र प्रहरीबीच आज अपरान्ह झडप भएको हो । माथिको आदेशको पालना गर्न आएको भन्दै पुगेका जनपथ र सशस्त्र प्रहरीको ठूलो टोली र स्थानीयबीच झडप हुँदा १५ बढी स्थानीयवासी घाइते भएका छन् भने प्रहरी तर्फ बालाजु प्रहरीका डीएसपी बालनरसिंह राणा घाइते भएका छन् । काठमाडौं र नुवाकोटबाट पुगेका प्रहरी तथा सशस्त्र प्रहरी र स्थानीयवासीबीच झण्डै डेढ घण्टा तनावपूर्ण अवस्था उत्पन्न भएको थियो ।

फोहर फ्याल्न नदिने अडानमा रहेका सिसडोलवासी र प्रहरीबीचको झडप नियन्त्रण गर्न प्रहरीले लाठीचार्ज गरेको थियो भने अश्रुग्याँस समेत प्रयोग गरेको सिसडोल व्यवस्थापन संघर्ष समितिका बरिष्ठ सल्लाहकार ज्ञानेन्द्रप्रकाश गजुरेलले जानकारी दिनुभयो । प्रहरीको लाठीचार्जले स्थानीय वृद्धवृद्धा समेत घाइते भएको गजुरेलले बताउनुभयो ।
झडपपछि पक्राउ परेको केहीलाई प्रहरीले नुवाकोट लगेको छ भने केहीलाई काठमाडौं ल्याएको छ ।

सिसडोलमा फोहर फ्याल्न थालेपछि १२ जना स्थानीयवासीको अनाहकमा मृत्यु भएको दावी गर्दै आएको समितिले आफुहरुको न्यूनतम मागमा पनि सरकारले ध्यान नदिएको आरोप लगाउदै आएको छ ।

समितिले सिसडोलवासी नागरिकको जीवन वीमा गरिनु पर्ने , पशुचौपायाहरुको पनि वीमा गरिनु पर्ने र बालीनालीको पनि वीमा गरिनु पर्ने माग गर्दै आएको छ । यही माग राखेर आन्दोलनमा उत्रिएका सिसडोलवासीले विगत ५ दिनदेखि सिसडोलमा फोहर फ्याल्न अवरोध पु¥याउँदै आएका थिए । तर आज स्थानीवासीको अवरोधबीच जबर्जस्ती फोहर फ्यालिएको थियो ।