शिवपुरीमा ६० वर्ष काटेका हजुरआमाहरु कखरा सिक्दै

नुवाकोट जेठ १,शिवपुरी गाउँपालिका वडा नम्बर ७ ड्म्रेका हजुरआमाहरु अहिले कखरा सिक्न थालेका छन ।

अनौपचारिक शिक्षा केन्द्र काठमाण्डौ र आधारशिला तालिम केन्द्रले आमाहरुका लागि कखरा सिक्ने व्यवस्था मिलाएको हो । जीवनको आधा दशक पार गरेका हजुरआमाहरु अहिले हातमा सिसाकलम र कपि बोकेर विद्यालयमा पौढ शिक्षा लिन आउन थालेका छन ।

सानो हुँदाा घाँस दाउरा गर्नमै व्यस्त भइयो, त्यसपछि घरपरिवार बालबच्चा भन्यो पढ्ने फुर्सद भएन । अहिले बुढेसकालमा फुर्सद भएकोले पढ्न आउन थालेको शिवपुरी गाउँपालिका वडा ७ डुम्रेकी ६८ वर्षिय खेलकुमारी पाण्डेले भनिन । उनले स्थानिय तहले दिने सेवा सुविधा समेत बैकबाट दिन थालेपछि आफुहरु पढ्न आउन थालेको बताइन । वृद्धभत्ता समेत बैकबाट नै भुक्तानी हुने गरेकोले अहिले नियमित पौढ कक्षामा बस्ने थालेको उनले बताइन ।

त्यस्तै डुम्रेकी ६२ वर्षिय अनिता ठकुरी नाम लेख्न जान्ने भएपनि नियमति पौढ कक्षामा पढ्न आउने गरेको बताउँछिन । नाम लेख्न त आउँछ तर अझै बढी जान्ने इच्छा भएर पौढ कक्षा पुन लिन आएको उनको भनाई छ । उनले यसअघिका अनौपचारिक शिक्षा कार्यक्रममार्फत नै नाम लेख्न जानेको बताइन । जीवनको उत्तरार्धमा किन पढ्न आउनुभएको त ? भन्ने प्रश्नमा हजुरआमाहरुले सरकारले दिने सेवा सुविधा लिन र अक्षर चिन्न कखरा सिक्न आएको बताए ।

अनौपचारिक शिक्षा केन्द्र काठमाण्डौ र आधारशिला तालिम केन्द्रले संचालन गरेको पौढ कक्षामा अहिले दुई समुहमा गरी ४० जना हजुरआमा र आमाहरु पढिरहेको सिद्धेश्वर महिला समुहकी शिक्षिका अनिता ठकुरीले जानकारी दिइन । ३ महिनासम्म संचालन हुने आधारशिला शिक्षा कार्यक्रम वैशाख १० गतेबाट संचालन भइहेको छ ।