अन्तरिम विधान र भातृ संगठन एकीकरणको मस्यौदा गर्न उपसमिति गठन

१५ फागुन,काठमाडौं । एमाले र माओवादीको पार्टी एकीकरणपछि बन्ने नेपाल कम्यूनिष्ट पार्टीको अन्तरिम विधान र संगठनात्मक एकता सम्बन्धी बिधि तयार पार्न गठिन कार्यदलले प्रारम्भिक मस्यौदा बनाउन उपसमिति गठन गरेको छ ।

एमाले केन्द्रीय कार्यालय धुम्बाराहीमा मंगलवार बसेको कार्यदलको बैठकले फागुन २२ भित्र प्रारम्भिक मस्यौदा पेश गर्न दुई/दुई सदस्यीय कार्यदल गठन गरेको हो ।

कार्यदलका प्रवक्ता गोकर्ण विष्टका अनुसार अन्तरिम बिधानको प्रारम्भिक खाका मस्यौदा गर्न माओवादीका वर्षमान पुन र एमालेका बेदुराम भुसाल रहेको उपसमिति गठन भएको छ ।

त्यस्तै जनसंगठन, भातृ संगठन, सामुदायिक संगठन, पेशागत संगठन र बिभिन्न प्रतिष्ठानहरुको एकीककरण बिधि र नीति तय गर्न अर्को कार्यदल बनेको छ ।

कार्यदलमा एमालेका गोकर्ण विष्ट र माओवादीका गिरिराजमणि पोखरेल छन् ।

दुवै उपसमितिले फागुन २२ गतेको बैठकमा प्रारम्भिक रिपोर्ट पेश गरेपछि कार्यदलले थप छलफल गरेर फागुन २५ भित्र अन्तरिम बिधान र संगठनात्मक एकीकरणकेा बिधि पार्टी एकता संयोजन समिति समक्ष पेश गर्नेछ ।

यसअघिको बैठकमा दुवै दलले आ-आफ्नो बिधान, दस्तावेज र कमिटीहरुको विवरण आदानप्रदान गरेका थिए ।

पार्टी केन्द्रदेखि गाउँ तहसम्मका कमिटीहरु एकीकरण गर्न यो कार्यदलले ठोस आधार तय गर्नेछ ।

त्यस्तै भातृ संगठनहरुको एकीकरणको बिधि समेत यही कार्यदलले तय गर्नेछ ।

कार्यदलको संयोजक माओवादी नेता रामवहादुर थापा बादल छन् भने एमालेबाट ईश्वर पोखरेल, बिष्णु पौडेल,गोकर्ण बिष्ट, सुरेन्द्र पाण्डे,रघुवीर महासेठ र बेदुराम भुसाल छन् ।

माओवादीबाट गिरिराजमणि पोखरेल,वर्षमान पुन, जनार्दन शर्मा र मात्रिका यादव सदस्य छन् ।