मेयर कप क्रिकेट : वडा नम्बर १ सेमिफाईनल प्रवेश

नुवाकोट । विदुर नगरपालिका वडा नम्बर १ पिपलटारमा जारी प्रथम विदुर मेयर कप वडास्तरीय टि–२० क्रिकेट प्रतियोगिताको सेमिफाईनल प्रवेश गरेको छ ।

बुधवार सम्पन्न भएको दोस्रो क्वाटरफाईनलमा विदुर नगरपालिका वडा नम्बर ६ लाई ५१ रनले पराजित गर्दै वडा नम्बर १ सेमिफाईनलमा प्रवेश गरेको हो ।

टस हारेर ब्याटिङ गरेको विदुर १ ले निर्धारित २० ओभरमा ८ विकेट गुमाउँदै १३३ रन बनाएको थियो । विदुर १ लाई विजय गराउन खेलको म्यान अफ दि म्याच समेत रहेका यादव लामिछानेले सर्वाधिक ४८ रन बनाउनुको साथै ४ विकेट हात पारे । त्यस्तै अजेश राज शाक्यले २६ र योगेन्द्र अमात्यले ११ रनको योगदान गरे ।

बलिङतर्फ विदुर ६ का प्रकाश रिमाल एक्लैले ५ विकेट लिए । त्यस्तै विक्रम लामिछानेले दुई विकेट हात पारे ।

जवाफमा १३४ रनको लक्ष्य लिएर मैदानमा आएको विदुर ६ ले १६.५ ओभरमा सबै विकेट गुमाएर मात्र ८२ रन बनाउन सक्यो । उसका लागि विक्रम लामिछानेले १८ रन बनाउनु वाहेक अन्य ब्यास्टम्यानले राम्रो खेल्न सकेनन् ।

प्रतियोगिताको सेमिफाईनल प्रवेश गरेको विदुर १ ले फाईनल प्रवेशको लागि वडा नम्बर ३ र ५ को विजेतासँग शुक्रवार प्रतिष्पर्धा गर्नेछ ।

विदुर नगरपालिकाको आयोजना तथा नुवाकोट क्रिकेट संघको आयोजनामा सहकार्यमा भइरहेको प्रतियोगिताको विजेताले ५० हजार, उप–विजेताले २५ हजार ट्रफी मेडल र प्रमाणपत्र हात पार्नेछ ।