चाडपर्व नजिकीएसँगै ग्रामीण भेगका नागरिकहरुलाई सामान ढुवानीमा समस्या

गंगटे–शेरा–ढिकुरे–छहरे हुदै टोखा निस्कने सडकको अबस्था जोखिमपूर्ण

नुवाकोट असोज २१,चाडपर्व नजिकिएसँगै ग्रामीण भेगका स्थानहरुमा खाद्यान्न सामाग्रीहरुको ढुवानी ब्यापक मात्रामा बढेपनि ग्रामीण भेगका सडकहरुको मर्मत सम्भार नहुँदा नागरिकहरु समस्यामा परेका छन् ।

बिजया दशमीको लागी गाउमा ब्यबसाय गरेर बस्ने सर्बसाधारणहरुले दशैको लागी भनेर सदरमुकाम बिदुर र नुवकोटको मुख्य बजार त्रिशूली र बट्टार लगायतका क्षेत्रबाट सामान खरिद गरेपनि सडकको बिजोकका कारण ढुवानी गर्न समस्या भएको सर्बसाधारणहरुको गुनासो रहेको छ । बर्खाको समयमा बाढी पहिरोका कारण ग्रामीण सडकहरु ठाउठाउ बिग्रिएपनि चाडपर्वको समयमा खाल्डो परेका सडकको समयमा नै मर्मत सम्भार हुन नसक्दा सर्बसाधारणहरु मारमा परेका छन् । राजधानी सँग जोडिएको जिल्ला नुवाकोट राजधानीबाटै नुवाकोट आवातजावत गर्ने तिनै वटै मार्गको अझैसम्म पनि मर्मत सम्भार हुन सकेको छैन । अधिकांश मानिसहरु रोजगारी र पढाईको शिलशिलामा राजधानीमा नै बसोबास गर्ने तर चाडपर्व मनाउनको लागी आफ्न्र जन्मभूमि गाउ आउन चाहने यात्रुहरुले यात्रा गर्न नै कठिन भैरहेको बताएका छन् ।

यस्तै, नुवाकोटको सदरमुकाम बिदुरसँगै जोडिएको गंगटे–शेरा–बराफेदी–ढिकुरे हुँदै छहरे– टोखा निस्कने सडकको लामो समयसम्म पनि स्तरोन्नति तथा मर्मत सम्भार हुन नसक्दा जोखिमको यात्रा गर्न कठिन भएको नागरिकहरुको भनाई रहेकोे छ । गंगटेदेखि छहरेसम्मको सडकखण्डमा बर्खाको समयमा परेको खाल्डाखुल्टी नपुरेको र तादी खोलाबाट बालुवा तथा गिटी बोकेको सवारीसाधनहरु ब्यापक मात्रामा गुड्ने गरेको कारण सडकको अबस्था बिजोक भएको सर्बसाधारणहरुले बताउने गरेका छन् । नुवाकोटबाट रसुवा, धादिङ, काठमाण्डौ लगायत अन्य स्थानमा आवातजावत गर्न जोखिम सडकको कारण उतिकै कठिन भईरहेको गंगटे –ढिकुरे हुदै पञ्चकन्या जान लागेका सुसिल पराजुलीको भनाई रहेको छ ।

यस्तै, ग्रामीण क्षेत्रहरुमा सडकको साथसाथै बिजुली पोल पनि उतिकै अब्यबस्थित ढंगमा राखिएको गं्रमीण क्षेत्रका सर्बसाधारणहरुले बताउने गरेका छन् । बिजुलीको पोल लडेर ठाउठाउमा जोखिम बढेको भन्दै सरोकारवाला निकायहरु मौन रहेको नागरिकहरु बताउछन् । दुप्चेश्वर गाउपालिका समुन्द्रटारका रामसिंह तामाङले जनताको समस्यालाई मध्यनजर गर्दै सम्बन्धित निकायले चाहे भने छोटो अबधिमा नै सडकको स्तरोन्नति हुने बताउनुभएको छ । उहाँले जोखिम र अब्यबस्थित सडकले दुर्घटना समेत निम्त्याउने गरेको बताउनुभएको छ ।
नेपालीहरुको बिशेष पर्व बिजया दशमी, तिहार नजिकीएसँगै सर्बसाधारणको बजारमा चहलपहल पनि बढेको छ । गाउगाउबाट सामान किनबेचको लागी बजार आउने जाने मानिसहरुको सवारीसाधनमा भिड नै लाग्ने गरेको छ । चाडपर्वको समयमा यात्रुले भरिएको सवारीसाधन गुड्न र सर्बसाधारणले सहज रुपमा हिडडुल गर्न ग्रामीण सडकहरुको मर्मत सम्भार हुनपर्ने सर्बसाधारणहरुले बताउदै आएका छन् ।