नुवाकोट जिल्ला लिगको उपाधि बट्टार युथ क्लबलाई

नुवाकोट । नुवाकोट जिल्ला लिग फुटवल प्रतियोगिताको उपाधि बट्टार युथ क्लबले हात पारेको छ ।

शनिवार सम्पन्न भएको फाईनल खेलमा न्यु ईनारपाटी युवा क्लबलाई ३–० गोल अन्तरले पराजित गरि बट्टारले उपाधिमाथि कब्जा जमाएको हो ।

गत शनिवार शुरु भएको प्रतियोगिताको फाईनल खेलको बाँकी रहेको समयको खेल आज खेलाइएपछि उपाधि विजेताको टुङ्गो लागेको हो ।

यसअघि गत शनिवार भएको खेलको ६५ औ मिनेटमा न्यु ईनारपाटी युवा क्लबले प्रहार गरेको गोललाई रेफ्रीले अफसाईड दिएपछि खेलाडी र दर्शकहरुले रफ्रीमाथि हात हालका थिए । त्यसपछि अवरुद्ध बनेको खेल पटक पटक गरि तीनपटक स्थिगित भएको थियो ।

प्रतियोगिताको विजेता बनेको बट्टार युथ क्लबले ५० हजार रुयैयाँ नगदसहित मेडल ट्रफी र प्रमाणपत्र हात पार्न सफल भयो । यस्तै उप–विजेता बन्न सफल भएको न्यु ईनारपाटी युवा क्लबले २५ हजार रुपैयाँ मेडल, ट्रफी र प्रमाणपत्र प्राप्त गर्न सफल भयो ।

ईनारपाटीले रेफ्रीमाथि छानविन गरि कारवाही र आफुले गरेको गोललाई मान्यता दिनुपर्ने माग गर्दै प्रतियोगिता नखेल्ने बताएको थियो ।

तर नुवाकोट जिल्ला फुटवल संघले भने उल्टै ईनारपाटी युवा क्लबलाई कारवाही गर्ने चेतावनी दिएपछि आज खेल सम्पन्न भएको हो ।