नक्कली नोटसहित नुवाकोटका तीनजना पक्राउ

नुवाकोट । नुवाकोटका तीनजना नक्कली नोटसहितत पक्राउ परेका छन् ।

उनीहरुलाई रसुवा प्रहरीले उत्तरगया गाउँपालिका वडा नं ५ स्थित होटेल हङरबेलीबाट नक्कली नेपाली नोट ल्याउँदै गरेको अवस्थामा पक्राउ गरेको हो ।

पक्राउ पर्नेमा ककनी गाउँपालिका वडा नं ६ बस्ने ३२ वर्षीय बुद्धिबहादुर तामाङ, विदुर नगरपालिका वडा नम्बर ८ बस्ने मानबहादुर गुरुङ र दुचेश्वर गाउँपालिका ७ बस्ने ४० वर्षीय ज्ञानेन्द्रबहादुर पण्डित रहेका छन् ।

उनीहरुलाई मंगलबार प्रहरीले विशेष सूचनाको आधारमा पक्राउ गरेको हो । नक्कली नोट छ भनी खबर पाएपछि इलाका प्रहरी कार्यालय कालीकास्थानबाट खटिएको टोलीले खोजतलास गर्दै जाँदा उक्त होटेलबाटै नक्कली नोटसहित बा ६५ प ७६७९ र बा ७३ प १५२५ नम्बर दुई स्कुटरलाई नियन्त्रणमा लिएका हुन् ।

होटेलको कोठामा कागज र पत्रिका काटिएका टुक्राहरु रहेको साथै स्कुटरको डिकिभित्रबाट रातो रंगको छालाको झोलाभित्र १ हजारको नेपाली नोटसहित पत्रिकालाई काटेर पैसाको आकारमा बनाएको फेला पारेको सूचना अधिकारी एवम् प्रहरी निरीक्षक नेत्र प्रसाद पौडेलले जानकारी दिए ।

त्यस्तै पैसाको आकारमा ४ बण्डल ५ सयको नोटको साइजमा काटिएको कागज फेला परेको उनले बताए ।

रसुवाले उनीहरूलाई ठगी उद्योगमा मुद्दामा दिन सातको म्याद दिई मुद्रासम्बन्धी कसुरमा अनुसन्धान अगाडि बढाइएको सूचना अधिकारी एवम् प्रहरी निरीक्षक पौडेलले जानकारी दिए ।

उनीहरूलाई ७ दिन म्याद थपी कारबाही अगाडि बढाइने बताइएको छ ।