नुवाकोटमा अवैध रुपमा पानी ट्याङकर चल्दै

नुवाकोट । नुवाकोटमा अवैध रुपमा पानी ट्याङ्कर चल्दै आएको छ ।

जिल्ला ट्राफिक प्रहरी कार्यालय नुवाकोटसँग सेटिङ मिलाएर पानी ट्याङकर व्यवसायीहरुले अवैध रुपमा पानी ट्याङकर चलाउँदै आएका हुन् । विदुर, बट्टार त्रिशुली र ढुङ्गे लगायतको स्थानमा बढी चल्ने सो पानी ट्याङ्करहरुका कागजातहरु रिन्यु फेल हुनुका साथै कोही चालकसँग सवारीचालक अनुमतिपत्र समेत नरहेको पाइएको छ ।

लामो समयदेखि जिल्लाको बजार क्षेत्रमा पानी विक्री गरिरहेका ट्याङकर व्यवसायीहरुको ट्राफिक प्रहरीले समेत चेकजाँच नगर्ने र चेकजाँच गरेपनि मिलेमतोमा छाड्ने गरेको गुनासो आउँन सुनिन थालेको छ ।

केही ट्याङ्कर व्यवसायीहरुले अनुमति नलिइकन ट्रकलाई समेत ट्याङकर बनाएर चलाउन थालेका छन् । यातायात कार्यालयमा ट्रकको अनुमति लिएर ब्लुबुकमा आफैले ट्याङकी लेखेर समेत ट्याङकर चलाइरहेका छन् ।

नुवाकोटको बजार क्षेत्रमा अहिले झण्डै पाँचओटा ट्याङ्करहरु चल्दै आएका छन् । जसमा बाघ भैरम खानेपानी सप्लायर्स र अनमोल खानेपानी सप्लायर्सले सानन २/२ ओटा पार्नी ट्याङकर चलाइरहेका छन् भने श्रेष्ठ पानी सप्लायर्सले एकओटा ट्याङकर संचालन गरिरहेको छ ।

जिल्ला प्रहरी कार्यालय नुवाकोटका प्रमुख राजिव तिवारीले जिल्लामा रहेका ट्याङकरहरुको विषयमा गुनासो आइरहेको भन्दै एक दुई दिनमा ट्याङकर समातेर कागजातहरु चेकजाँच गर्ने बताए । मलाई जिल्लामा संचालित ट्याङकरहरुको विषयमा गुनासो आइरहेको छ एक दुई दिनमा नतिजा देखिने गरि कारवाही गर्छु, तिवारीले विदुर खबरसँग भने ।

तर अवैध रुपमा संचालन भइरहेको ट्याङकरबाट कुनै र्दुघटना निम्तिएमा ठुलो मुल्य चुकाउनुपर्ने भन्दै सरोकारवालाहरुले चिन्ता जनाएका छन् ।