Advertisement

विदुर नगरपालिका उपमेयर प्रभा बोगटीले नदीजन्य पदार्थको दोहन र दर्ता नभएका क्रसर बन्द गर्नुपर्ने बताइन् । उनले रातको समयमा देवीघाटदेखि बुधसिङघाटसम्म अवैधरुपमा बालुवा निकाल्ने गरेको बताइन् । केही जनप्रतिनिधिले खोलाको बालुवा बगेर भारत तथा बंगलादेश जाने भएकाले बालुवा झिक्न दिनूपर्ने बताएका थिए ।

सरकार र सर्वोच्च अदालतबाट समेत रोक लगाइएको नदीजन्य पदार्थ झिक्दा विपद् बढ्ने र कानुनको खिलाप हुने भएकाले रोक्नुपर्ने प्रमुख जिल्ला अधिकारी नारायणप्रसाद रिसालले बताए । नदीजन्य पदार्थ झिकेर राजस्व बढ्छ भनेर स्थानीयवासीलाई जोखिममा पार्न नहुने प्रजिअ रिसालको भनाइ छ ।

नदीजन्य पदार्थको ठूलो बजार राजधानी काठमाडौं उपत्यका रहेको छ । कानुनलाई मिचेर नदीजन्य पदार्थ उत्खनन गर्न दिन नमिल्ने जिसस प्रमुख रजिन्द्र विक्रम सिंह ठकुरीले बताए । ‘कानुनलाई मिचेर उत्खनन गर्न दिन सकिँदैन,’ उनले भने । जिल्ला अनुगमन समितिले स्थानीय तहहरुलाई वर्षात्‌को समयमा नदीजन्य पदार्थको उत्खनन गर्दा जोखिम हुने भन्दै उक्त अवधिमा कोही कसैबाट अवैध उत्खनन र संकलन हुन नदिन सबै अनुगमन समिति स्थानीय तह तथा सम्बन्धित निकायहरुले प्रविधिकसहितको अनुगमन टोली बनाई पूर्ण सक्रियताका साथ अनुगमन गर्नुपर्ने निर्देशन दिएका छन् ।

त्यसका लागि जिल्ला प्रहरी कार्यालय र सशस्त्र प्रहरीले दिन र रात्रिकालीन गस्ती गर्ने निर्णय गरेको छ । जिल्लाका विभिन्न खोला/नदी तथा खानीबाट उत्खनन गरी घाटगद्दीमा संकलन गरिएको वस्तु स्थानीयहरुले नापजाँच गरी साउन १५ गतेभित्र समितिमा बुझाउन भनिएको छ ।