नुवाकोटमा मतदाता नामावली संकलन स्थगित

नुवाकोट । जिल्ला निर्वाचन कार्यालय नुवाकोटले मतदाता नामावली संकलनको काम स्थगित गरेको छ ।

सरकारले निर्वाचनको घोषणा गरेपछि निर्वाचनका लागि मतदाता नामावली संकलन गर्न नपाइने कानुनी व्यवस्था छ । सकारले निर्वाचनको मिति घोषणा गरेसँगै आयोगको बैठकले नामावली संकलन रोक्न देशभरका जिल्ला निर्वाचन कार्यालयमा परिपत्र गरेसँगै जिल्ला निर्वाचन कार्यालय नुवाकोटले मतदाता नामावली संकलन स्थगित गरेको निमित्त जिल्ला निर्वाचन अधिकारी रुद्र बहादुर सुसलिङले जानकारी दिए ।

अहिलेसम्म संकलन भएको नामावली निर्वाचन आयोगले वडा तहमा प्रकाशित गर्नेछ र त्यसमा दावी विरोध भए उजुरी दिन आह्वान गर्नेछ । र दावी विरोध भए छानबिनपछि अन्तिम नामावली प्रकाशित हुनेछ । त्यही अन्तिम नामावलीमा परेका मतदाताहरुले मात्रै आगामी स्थानीय निर्वाचनमा मतदान गर्न पाउनेछन ।

यसका लागि करिब ३५ देखि ४० दिन लाग्ने आयोगको अनुमान छ । नुवाकोटमा अहिले २ लाख ३९ हजार ५ सय ४५ मतदाता रहेका छन् ।