नुवाकोटका स्थानियतह बजेट निर्माणको अन्तिम तयारीमा

विदुर । नुवाकोटका स्थानियतहहरु आगामी आर्थिक वर्षको बजेट निर्माणको अन्तिम तयारी जुटेका छन् ।

बजेट निर्माणका लागि विगत एक महिनादेखि जनस्तरबाट सुझाव लिएका स्थानिय तहहरुले बजेटलाई अन्तिम रुप दिन छलफललाई तिव्र पारेका छन । संविधान अनुसार असार १० गते स्थानिय तहले आगामी आर्थिक वर्ष २०७७÷७८ को बजेट सार्वजनिक गर्नुपर्ने हुन्छ । बजेट सार्वजनिक गर्न एक दिन मात्रै बाँकी रहँदा स्थानिय तहले छलफल तीव्र पारेका छन । विशेष गरि नुवाकोटका स्थानिय तहले यो वर्ष स्वास्थ्यलाई बजेमा प्राथमिकता दिएको स्थानिय तहका उपप्रमुखहरुले जानकारी दिएका छन ।

विगतका भन्दा आगामी आर्थिक वर्षमा कार्यान्वयनमूखि बजेट निर्माण गर्न स्थानिय सरकारले सरोकारवाला निकायसँग छलफलसमेत गरेको छ । बजेट निर्माणमा नागरिक समाज, युवा, राजनीतिक दलका प्रमुख लगायतले चासो देखाएका छन् ।
टुक्रे विकास योजनामा बजेट विनियोजन हुँदा कार्यान्वयनमा समस्या देखिएकाले समस्या हुने गरेको सरोकारवालाहरु बताउँछन । जनताका विकास आवश्यकतालाई बजेटमा सम्बोधन गर्ने गरि योजना निर्माण गर्न यो पटक स्थानिय तहहरु लाग्ने विशवास गरिएको छ ।

अहिले विश्वभर नै कोरोनाको महामारी बढेको कारण नुवाकोटका सबै स्थानिय तहले आगामी आर्थिक वर्षको बजेट स्वास्थ्य केन्द्रित बनाएका छन् । सुर्यगढी गाउँपालिकाले आगमी वर्षको बजेट स्वास्थ्यलाई केन्द्रमा राखेर बनाएको गाउँपालिकाका अध्यक्ष सन्तवहादुर तामाङले बताए । उनले गाउँपालिकाको आगामी वर्षको बजेको प्राथमिकतामा कृषि र शिक्षा समेत परेको बताए ।

त्यस्तै ककनी गाउँपालिकाका अध्यक्ष मान वहादुर लामाले गाउँपालिकाले यो वर्षको वजेट कोरोना भाइरस र त्यसपछिको रोकथाममा प्रयोग गर्ने बताए । उनले ककनी मुला,स्ट्रोवेरी र ट्राउट माछाको जोनको रुपमा परिचित भएको भन्दै ती कृषिकहरुलाई पनि बजेटमा समेटिने बताए । जिल्लाको समृद्धिका लागि जनताका आवश्यकतासँगै भौतिक पूर्वाधारलाई समेत प्राथमिकता दिइने उनले बताए ।