नुवाकोटका बजार क्षेत्रमा प्रहरी आफै पसलको सटर बन्द गराउँदै (भिडियोसहित)

विदुर । केन्द्र सरकारले आजबाट अघोषित रुपमा लकडाउन खुल्ने बताएपछि नुवाकोटका बजार क्षेत्रमा आजबाट चहलपहल शुरु भएको छ ।

केन्द्र सरकारले गत चैत ११ गतेबाट लकडाउन घोषणा गरेसँग अधिकांश बन्द रहेका कोलनी त्रिशुली,ढुङ्गे, विदुर, बट्टार, पिपलटार, देविघाट लगायतका बजार क्षेत्रका पसलहरु आजबाट खुल्न थालेका छन । तर लकडाउनको समयमा बजारका पसलहरु खुलेको भन्दै नुवाकोट प्रहरीले बजार क्षेत्रका पसलहरु बन्द गराउँदै हिँडेका छन । तर प्रहरीको पसल बन्द गराउने शैली राम्रो नभएको भन्दै व्यापारीहरुले असन्तुष्टि जनाएका छन ।

बट्टारका एक स्थानिय व्यापारीले लामो समयसम्म लकडाउन हुँदा आफुहरु मर्कामा परेको भन्दै आजबाट पसल खोलेपनि प्रहरीले दादागिरीको शैलीमा पसल बन्द गराउँदै हिँडेको बताए । उनले आफु पसलभित्र रहेकै अवस्था प्रहरी आएर सटर लगाएको बताए । तर नुवाकोट प्रहरीको डिएसपी राजेश थापाले लकडाउन कायमै रहेकोले प्रहरीले जिल्लास्तरीय क्राइसिस म्यानेजमेन्ट सेन्टरले गरेको निर्णय अनुसार नै तोकिएको समयभन्दा बढी पसले खोलेको भन्दै बन्द गरिएको बताए ।

डिएसपी थापाले सो बताइरहँदा आज दिनभर नुवाकोटको बजार क्षेत्रमा बाक्लो रुपमा सवारी साधन संचालन भइरहेको छ । बजार क्षेत्रमा लकडाउनकै अवधिमा पसलहरु समेत खुल्ला भएको छ ।