पञ्चकन्या गाउँपालिकामा कर्मचारी अभाव

विदुर खबर २०७६ पुष १ गते १०:५८

नुवाकोट । नुवाकोटको पञ्चकन्या गाउँपालिकामा कर्मचारी अभावका कारण कार्यसम्पादनमा समस्या देखिएको छ । गाउँपालिकामा २९ जनाको दरबन्दी भए पनि सातजना मात्र कार्यरत छन् ।

‘पर्याप्त कर्मचारी नहुँदा काम गर्न कठिनाइ भइरहेको छ,’ गाउँपालिका अध्यक्ष तेजबहादुर तामाङले भने, ‘बढीजसो प्राविधिक कर्मचारीको अभाव छ ।’ यहाँ आएका स्थायी कर्मचारी सरुवा मिलाएर सुगममा जाने गरेका छन् । स्थानीय प्रशासन र जिल्ला समन्वय समितिमा गुनासो गरे पनि दरबन्दीअनुसार नपठाइएको अध्यक्ष तामाङले बताए ।

शिक्षा क्षेत्र हेर्ने विद्यालय निरीक्षक र स्रोतव्यक्ति छैनन् भने माविमा अध्यापन गराउने शिक्षकको अभाव छ । गाउँपालिकाले प्राथमिक तह अध्यापन गराउने शिक्षकबाट माविका विद्यार्थीलाई पढाउने कार्य गराइरहेको छ । ‘स्वयंसेवक शिक्षक भनेर तलबभत्ता दिनेगरी व्यवस्थापन मिलाएका छौं,’ अध्यक्ष तामाङले भने । शिक्षक सेवा आयोगबाट सातजना आउने भए पनि अझै शिक्षक अपुग हुने उनले बताए । गाउँपालिकामा नौवटा मावि छन् ।

यहाँ कृषि क्षेत्रमा कुनै समस्या आए प्राविधिक ज्ञान भएका विशेषज्ञ छैनन् । खानेपानीको इष्टिमेट गर्ने प्राविधिक छैनन् । ‘खानेपानीको अत्यधिक माग छ,’ अध्यक्ष तामाङले भने, ‘प्राविधिक नहुँदा खानेपानीको काम गर्न सकिएको छैन ।’