अवैध रुपमा काठ बेचेका बेलकोटगढीका वडाअध्यक्ष सिलवाल फरार

नुवाकोट । अवैध रुपमा सालको काठ बेचको आरोपमा जिल्ला वन कार्यालयले जिल्ला प्रहरी कार्यालय नुवाकोटलाई पक्राउ पूर्जी जारी गरेपछि नुवाकोटको बेलकोटगढी नगरपालिका वडा नम्बर १२ का वडाअध्यक्ष डिल्लीराम सिलवाल फरार भएका छन ।
नुवाकोट जिल्ला अदालतले अनुसन्धानका लागि नियन्त्रणमा लिन आईतबार पक्राउ पूर्जी दिएसँगै नुवाकोट प्रहरीले वडाअध्यक्ष सिलवाललाई प्रहरीले खोजी रहेको छ । नुवाकोट प्रहरीले वडाअध्यक्ष सिलवाललाई खोजे पनि वडाअध्यक्ष सिलवाल भने फरार रहेको जिल्ला प्रहरी कार्यालय नुवाकोटले जनाएको छ । जिल्ला प्रहरी कार्यालय नुवाकोटका डिएसपी तथा सुचना अधिकारी राजेश थापाले वनको पत्र पाएपछि आफुहरु वडाअध्यक्ष सिलवालको खोजीमा लोगपनि वडाअध्यक्ष सिलवाल फेला नपरेको बताए । जिल्ला अदालतले आईतबार डिभिजन वन कार्यालयको हिरासतमा रहेका आईचर चालकहरु बेलकोटगढी नगरपालिका वडा नं. १२ का ४२ वर्षिय प्रविण श्रेष्ठ र सोही स्थानका २६ वर्षिय वसन्त कुमार श्रेष्ठलाई दोस्रो पटक पाँच दिनको म्याद थप गरी अनुसन्धानको दायरामा आएका वडा अध्यक्ष सिलवालसहित ३ जनालाई पक्राउ अनुमति दिएको थियो ।
यसअघि मंगलबार जिल्ला प्रहरी कार्यालय नुवाकोटले बा. ३ क. १४५२ र बा. ४ ख. ९४०७ नम्वरको दुईवटा आईचर मिनिट्रकमा एकसय ३० दशमलव ४० घनफिट बराबरको २५ गोलिया साल र ६ दशमलव ७७ घनफिट असना नामको ३ गोलिया काठ नियन्त्रणमा लिई डिभिजन वन कार्यालय नुवाकोटमा बुझाएको थियो ।

प्रतिबन्धित सालको काठ अधिकार नहुँदा नहुँदै लिलाम गरेको बेलकोटगढी नगरपालिकाको वडा नम्वर १२ ले काठ लिलाम बापतको रकममा समेत हिनामिना गरेको पाईएको छ । काठ लिलाम सकार्ने बिदुर नगरपालिका वडा नम्वर ५ का किसन चित्रकारसंग तीनलाख ७६ हजार बुझेर भरपाई समेत गरेपनि नगदी रसिदमा भने दुईलाख १७ हजार मात्र बुझेको उल्लेख गरेको छ । यस संबन्धमा जिज्ञासा राख्दा वडा अध्यक्ष सिलवालले सडक निर्माणका क्रममा लडेपडेका रुखहरुको ब्यवस्थापनमा भएको खर्च उक्त रकमबाट ब्यहोरिएको बताएका छन् । तर नगर कार्यपालिकाको राजश्व खातामा जम्मा हुनुपर्ने रकम यसरी आफूखुशी खर्च गरिनु भ्रष्टाचारजन्य काम भएको नगरपालिका सम्बद्ध स्रोतले बताएको छ ।