‘माननीय’हरु पक्राउको सन्देश : कानुनी शासन पालनाको सुरुवात

नुवाकोट । ०६४ चैत २७ गते रौतहटमा भएको हत्याकाण्डमा संलग्न रहेको आरोपमा मोहमद अफताब आलमलाई प्रहरीले १२ वर्षपछि पक्राउ गरेको छ । आलम रौतहट क्षेत्र नम्वर २ बाट नेपाली कांग्रेसका सांसद थिए ।

हत्या आरोपमा पक्राउ परेसँगै आलम संसदबाट निलम्बित भइसकेका छन् । पहिलो संविधानसभा चुनावको एक दिनअघि रौतहटको फरहदवामा भएको हत्याकाण्डमा १४ जनाको ज्यान गएको थियो ।

आइतबार रौतहटबाटै पक्राउ परेका आलमलाई थप ७ दिन थुनामा राखेर अनुसन्धान गर्न प्रहरीले अदालतबाट समय लिइसकेको छ ।

महिला कर्मचारीलाई दुर्व्यवहार गरेको आरोपमा पक्राउ परेका निर्वतमान सभामुख कृष्णबहादुर महरा अहिले प्रहरी हिरासतमा छन् । उनलाई थप तीन दिन हिरासतमा राखेर अनुसन्धान गर्न जिल्ला अदालत काठमाण्डौले मंगलबार प्रहरीलाई अनुमति दिएको छ । संसद सचिवालयमा नै काम गर्ने महिला कर्मचारीलाई यौन दुर्व्यवहार गरेको आरोप लागेपछि महरालाई दशैँको बेला गएको १९ गते प्रहरीले सरकारी निवासबाटै पक्राउ गरेको थियो ।

उनीमाथिको आरोपका बारेमा प्रहरीले अहिले छानबिन गरिरहेको छ । यौन दुर्व्यवहारको आरोप लागेपछि सभामुख पदबाट महराले राजीनामा दिइसकेका छन् भने पक्राउ परेसँगै सांसद पद पनि निलम्बन भएको छ ।

यस्तै मंगलबार मात्रै अर्का सांसद प्रमोद साहलाई पनि प्रहरीले पक्राउ गरेको छ । राजपाका सांसद साहलाई जनकपुर विमानस्थलमा रहेको बुद्ध एअरको काउण्टर तोडफोड गरेको आरोपमा प्रहरीले काठमाण्डौबाट पक्राउ गरेको हो । उनलाई प्रहरीले हिरासतमा राखेर थप अनुसन्धान गरिरहेको छ ।

यसरी पछिल्लो दुई सातामा विभिन्न आरोपमा तीन सांसद प्रहरी हिरासतमा पुगेका छन् ।यसअघि कर्तव्य ज्यान मुद्धामा रेशम चौधरी र कूटनीतिक राहदानी दुरुपयोग गरेको मुद्धामा नारदमुनि राना पूर्पक्षका लागि थुनामा छन् । त्यस्तै निलम्बित सभाषद  तथा पूर्व राज्यमन्त्री सञ्जय साह जनकपुर बम काण्डका दाेषी ठहरिएसँगै जेलमा सजाय काटिरहेका छन् । त्यस्तै नेकपाका सांसद पार्वत गुरुङविरुद्ध बुधबार ज्यान मार्ने उद्याेगमा काठमाण्डाै जिल्ला अदालतले पक्राउ पूर्जी जारी गरेकाे छ ।

सभामुख जस्तो उच्च पदमा रहेका र पटक–पटक मन्त्री तथा सांसद बनेका व्यक्ति पक्राउ पर्नुले कानुन सबैलाई बराबरी हुन्छ भन्ने देखाएको छ । अपराध गर्ने जोकोहीले पनि उन्मुक्ति पाउन सक्दैन भन्ने सन्देश पछिल्लो घटनाक्रमले दिएको राजनीतिक विश्लेषक पुरञ्जन आचार्य बताउनुहुन्छ ।

विगतमा पहुँचकै भरमा उन्मुक्ति पाउँदै आएकाहरु धमाधम पक्राउ पर्न थाल्नुले हामीले ल्याएको व्यवस्थाले सबैलाई बराबर व्यवहार गर्दो रहेछ भन्ने विश्वास पैदा हुन थालेको उहाँको भनाइ छ ।