नेपालमा भारतीय पर्यटकको लर्को

नुवाकोट । भारतका विभिन्न राज्यमा गर्मी अत्यधिक बढेसँगै नेपाल आउने भारतीय पर्यटकको सङ्ख्या उल्लेखनीय रूपमा बढ्न थालेको छ ।

खुला सीमा, तुलनात्मक रूपमा चिसो मौसम, धार्मिक तथा प्राकृतिक पर्यटकीय गन्तव्य र सवारी साधनसहित सहज प्रवेशको व्यवस्थाका कारण पछिल्ला साताहरूमा भारतीय पर्यटकको आगमन तीव्र भएको हो ।

यससँगै नेपालका प्रमुख पर्यटकीय सहर र राजमार्गमा ट्राफिक व्यवस्थापन, पार्किङ, सार्वजनिक सरसफाइ तथा सुरक्षा व्यवस्थापनसम्बन्धी नयाँ चुनौतीहरू पनि देखिन थालेका छन् ।

गृह मन्त्रालय र पर्यटन क्षेत्रसँग सम्बन्धित अधिकारीहरूका अनुसार विशेष गरी वीरगञ्ज, भैरहवा, नेपालगञ्ज, काँकडभिट्टा र महेन्द्रनगर नाकाबाट दैनिक ठूलो सङ्ख्यामा भारतीय नम्बर प्लेटका साना तथा ठूला सवारीसाधन नेपाल प्रवेश गरिरहेका छन् । तीमध्ये अधिकांश पर्यटक पोखरा, बन्दीपुर, मनकामना, मुक्तिनाथ, जनकपुर, लुम्बिनी तथा माथिल्लो मुस्ताङसम्म पुग्ने गरेका छन् । काठमाडौँ उपत्यकामा समेत भारतीय पर्यटक बोकेका निजी कार, जीप र बसको सङ्ख्या दिनप्रतिदिन बढिरहेको ट्राफिक प्रहरीको भनाइ छ ।

नेपाल पर्यटन बोर्डका सूचना अधिकारी मणिराज लामिछानेका अनुसार गर्मीयाममा भारतबाट नेपाल आउने पर्यटकको सङ्ख्या हरेक वर्ष बढ्ने गरे पनि यस वर्ष वृद्धि तुलनात्मक रूपमा अझै उल्लेखनीय देखिएको छ । उहाँले भन्नुभयो–‘नेपाल भारतीय पर्यटकका लागि सहज, नजिक र मौसमका हिसाबले आकर्षक गन्तव्य हो । धार्मिक, सांस्कृतिक र प्राकृतिक पर्यटनलाई लक्षित गरेर धेरै भारतीय परिवार आफ्नै सवारीसाधनमा नेपाल भ्रमणमा आउने गरेका छन्। यसले पर्यटन व्यवसायलाई सकारात्मक ऊर्जा दिएको छ ।’

तर, पर्यटकको चाप बढेसँगै व्यवस्थापनका चुनौती पनि थपिएका छन् । विशेष गरी नेपालको ट्राफिक नियमबारे जानकारी नहुँदा कतिपय भारतीय चालकहरू अनावश्यक रूपमा कारबाहीमा पर्ने गरेका छन् । गलत लेन प्रयोग गर्ने, जथाभावी पार्किङ गर्ने, निषेधित क्षेत्रमा सवारी रोक्ने तथा ट्राफिक सङ्केतको बेवास्ता गर्ने घटना बढेको ट्राफिक प्रहरीको भनाइ छ ।

यस विषयमा नेपाल प्रहरीका केन्द्रीय प्रवक्ता प्रहरी नायब महानिरीक्षक अविनारायण काफ्लेले विदेशी पर्यटकलाई सहज र सुरक्षित वातावरण उपलब्ध गराउनु प्रहरीको दायित्व भए पनि नेपाल प्रवेश गर्ने सबैले नेपालको कानुन पालना गर्नुपर्ने स्पष्ट पार्नुभयो । उहाँले भन्नुभयो– ‘भारतसहित जुनसुकै देशबाट नेपाल आउने पर्यटकले यहाँको कानुन र ट्राफिक नियमको पालना गर्नुपर्छ । सीमा नाकाहरू तथा प्रमुख पर्यटकीय मार्गमा ट्राफिक प्रहरीले सचेतनामूलक कार्यक्रम सञ्चालन गरिरहेको छ ।

नियमको जानकारी गराउने, आवश्यक सहजीकरण गर्ने र सुरक्षित यात्राका लागि सहयोग गर्ने काम निरन्तर भइरहेको छ । सुरक्षा व्यवस्थालाई पनि थप प्रभावकारी बनाइएको छ ।’

प्रहरीका अनुसार सीमा नाकाबाट प्रवेश गर्ने विदेशी नम्बर प्लेटका सवारीसाधनलाई आवश्यक जानकारी दिने, ट्राफिक नियमसम्बन्धी पर्चा वितरण गर्ने तथा संवेदनशील स्थानमा विशेष निगरानी बढाउने कार्य भइरहेको छ ।