रसुवागढी नाका पुस १० देखि सञ्चालनमा ल्याउने तयारी

नुवाकोट । रसुवागढी नाका आगामी पुस १० गतेदेखि संचालनमा ल्याउने तयारी गरिएको छ ।

चिनले बेलिब्रिज निर्माण गरेसँगै रसुवागढी नाका संचालनमा ल्याउने तयारी गरिएको हो । रसुवा भन्सार कार्यालयका प्रमुख तुलसी भट्टराईले नाका पुस १० गतेदेखि सञ्चालन गर्ने तयारी रहेको अनौपचारिक जानकारी चिनियाँ पक्षबाट आएको बताए ।

‘चिनियाँ पक्षले नाका सञ्चालनको मितिबारे हामीलाई औपचारिकरुपमा जानकारी दिएको छैन । तर पुस १० गतेदेखि सञ्चालनमा ल्याउन त्यसअगाडि नै कन्टेनर चालकलाई केरुङ जान दिने कुरा आएको छ,’ भट्टराईले भने।

असार २३ गते ल्हेन्दे खोलामा आएको बाढीले नेपाल र चीनलाई जोड्ने पुल बाढीले बगाएपछि नाका पूर्णरुपमा बन्द भएको थियो । बेलिब्रिज बनाउने काम एक साताअघि नै सम्पन्न भएको थियो ।