बेलकोटगढीको काशीटारमा व्यापक नदि दोहन, प्रशासन मौन

काशीटार असार २९, नुवाकोटको बेलकोटगढी नगरपालिका वडा नम्बर ८ काशीटारमा व्यापक रुपमा नदि दोहन भएपनि जिल्ला प्रशासन कार्यालय, जिल्ला प्रहरी कार्यालय र जिल्ला समन्वय समिति मौन देखिएको छ ।

गत साता मात्र असारदेखि भदौसम्म ३ महिना नदिजन्य पदार्थको उत्खननमा रोक लगाउने निर्णय गरेको जिल्ला प्रशासन कार्यालय नदीहरुमा व्यापक रुपमा दोहन हुँदा समेत मौन देखिएको छ । जिल्लाको काशीटार,रातमाटे,कोल्पुटार लगायतको स्थानमा व्यापक रुपमा राती नदि दोहन हुँदा समेत प्रहरी र प्रशासन मौन रहेका छन । रातको समयमा तस्करहरु खोलामा पस्ने गरेकोले आफुहरु दैनिकजसो धपाउन जाने गरेको जिल्ला प्रहरी कार्यालय नुवाकोटका एसपी कृष्णपल्ली मगरले जानकारी दिए ।

तस्करहरु विशेषगरि वेलकोटगढी नगरपालिका वडा नम्बर ८ मा रहेको रातडाँडा पेटापाखा बन उपभोत्ता समितिको बनमा रहेको सिसौघारीमा केन्द्रित भएको एक स्थानियबासीले विदुरखबरलाई जानकारी दिए । तस्करहरुले अवैध नदीजन्य पदार्थको उत्खनन गरेको थाहा पाउँदा पनि जिल्लाका प्रहरी र प्रशासन मौन छन नाम उल्लेख नगर्ने सर्तमा एक स्थानियले बताए ।

सिसौघारीको अवैध उत्खननमा वन उपभोत्ता समितिदेखि वडा नम्बर ८ का वडाअध्यक्ष भोज प्रसाद पुडासैनीको समेत संलग्नता रहेको स्थानियवासी बताउँछन । काशीटारको विभिन्न स्थानमा जनप्रतिनिधिको आडमा तस्करी हुने गरेको उनले बताए ।