देवीघाटमा तुइन सञ्चालन, स्थानीयलाई राहत

नुवाकोट । भदौ १० गते त्रिशूली नदीमा आएको विनाशकारी बाढीले पक्की तथा झोलुंगे पुल बगाएपछि सास्ती खेपिरहेका नुवाकोटका स्थानीयका लागि वैकल्पिक रूपमा तुइन सञ्चालनमा ल्याइएको छ।

विदुर नगरपालिका–५ देवीघाट क्षेत्रमा शुक्रबार साँझ ५ बजेदेखि तुइन सञ्चालनमा आएको हो।गत भदौ १० गतेको अविरल वर्षा र बाढीका कारण देवीघाट बजारसहित आसपासका क्षेत्रमा ठूलो जनधनको क्षति भएको थियो।

बाढीले ओहोरदोहोर गर्ने मुख्य पक्की पुल र झोलुंगे पुलसमेत बगाएपछि विदुर नगरपालिका वडा नम्बर ३ र ५ का स्थानीयको आवतजावत पूरै ठप्प बनेको थियो। नदी वारपार गर्न नसक्दा स्थानीयले दैनिक उपभोग्य सामान ढुवानी र औषधि उपचारका लागिसमेत ठूलो कठिनाइ भोग्दै आएका थिए।

स्थानीयको यो सास्तीलाई ध्यानमा राख्दै तत्कालका लागि तुइन सञ्चालनमा ल्याइएको विदुर–३ का वडाध्यक्ष बद्री रिमालले जानकारी दिए। तुइन सञ्चालनमा आएपछि अत्यावश्यक कामका लागि नदी वारपार गर्न र खाद्य सामग्री ढुवानी गर्न केही सहज हुने अपेक्षा गरिएको छ।

यद्यपि, वर्षातको समयमा उर्लंदो त्रिशूली नदीमाथि तुइनको जोखिमपूर्ण यात्रा गर्नुपर्ने बाध्यता कायमै रहेकाले स्थानीयले भने यथाशीघ्र बेलिब्रिज वा नयाँ झोलुंगे पुल निर्माण गरी आवतजावतलाई सुरक्षित र व्यवस्थित बनाउन सरकारसँग माग गरेका छन्।