तरुण दल नुवाकोटको अध्यक्षमा दिलबहादुर तामाङ

नुवाकोट । नेपाली कांग्रेसको भ्रातृ संस्था नेपाल तरुण दल नुवाकोटको रिक्त अध्यक्ष पदमा दिलबहादुर तामाङ (घिसिङ) मनोनीत भएका छन्।

नेपाल तरुण दल केन्द्रीय समितिले तामाङलाई जिल्ला अध्यक्षको जिम्मेवारी सुम्पेको हो। केन्द्रीय अध्यक्ष मनिष कोइरालाद्वारा हस्ताक्षरित पत्र अनुसार, तरुण दलको सिद्धान्त, आदर्श र विधान एवं केन्द्रको नीति-निर्देशन बमोजिम संगठनलाई सुदृढ र गतिशील बनाउन उनलाई निर्देशन दिइएको छ।

मनोनयन पत्रमा आगामी २०८३ साल कात्तिक मसान्तभित्र जिल्ला अधिवेशन सम्पन्न गर्न समेत समयसीमा तोकिएको छ। नवनियुक्त अध्यक्ष तामाङलाई सफल कार्यकालको शुभकामना व्यक्त गरिएको छ।

पत्रको बोधार्थ नेपाली कांग्रेस जिल्ला कार्यसमिति नुवाकोटका सभापतिलाई दिइएको छ।