तारकेश्वरका आशिष घिमिरे मृत अवस्थामा भेटिए

नुवाकोट । नुवाकोटको तारकेश्वर गाउँपालिका वडा नम्बर १ कात्तिके घर भएका आशिष घिमिरे मृत अवस्थामा फेला परेका छन् ।

गत साता साथीहरुसंग पौडी खेल्ने क्रममा त्रिशुली नदिमा बेपत्ता भएका उनको शव विदुर ३ सिंखालीको नयाँ पुल नजिक भेटिएको प्रहरीले जनाएको छ ।

विदुर ५ देवीघाटको शहिद जगत प्रकाशजंग शाह संस्कृत माविको गुरुकुलमा वसेर कक्षा ८ पढ्दै आएका उनी यहि फागुन २१ गते निर्वाचनको दिन साथीहरुसँग त्रिशुली नदिमा पोडी खेल्न गएका थिए । नदिमा पौडी खेल्ने क्रममा बेपत्ता भएका उनको खोजी लामो सयमदेखि भएपनि पत्ता लागेको थिएन ।

घटनाको दिन गुरुकुलमा विद्यार्थीहरुलाई एक्लै छाडेर सबै मतदान गर्न गएपछि उनी सहित अन्य साथीहरु नदिमा पाैडी खेल्न गएको बताइएको छ ।

मृतक घिमिरेका परिवारले विद्यालयमा रेखदेखको लागि कोही नहुन दुखद भएको भन्दै दोषीलाई कारवाहीको माग समेत गरेका छन् । उनीहरुले विद्यालय प्रशासनले गम्भीर गल्ती गरेको भन्दै घटनाको निष्पक्ष छानविन हुनुपर्ने बताएका छन् ।

उनको शवलाई अहिले पोष्टमार्टमको लागि त्रिशुली अस्पताल लगिएको छ । घटनाको विषयमा थप अनुसन्धान भइरहेको प्रहरीले जनाएको छ ।