नुवाकोटमा एचआइभी संक्रमित झण्डै दुईसय पुगे

नुवाकोट । नुवाकाेटमा एचआइभी/एड्सलाई न्युनीकरणका लागि प्रभावकारी रुपमा सचेतना प्रदान गर्न आवस्यक रहेको बताइएकाे छ ।

नुवाकोटमा हालसम्म एकसय ९५ जना एचआईभी÷एड्स संक्रमित औपचारिक रूपमा पहिचान भई नियमित औषधि सेवन गर्दै आएका छन् । उनीहरुलाई नियमित उपचार सेवा तथा परामर्शसमेत दिइरहेको त्रिशूली अस्पतालले जनाएको छ ।

एचआईभी/एड्स संक्रमित न्युनीकरणका लागि सरोकारवाला पक्ष क्रियाशील भई जनचेतना र यसको नियन्त्रणको उपाय प्रभावकारी वनाइनु पर्नेमा जोड दिइएको छ ।

विश्व एड्स दिवसको अवसरमा गत साता त्रिशूली अस्पतालमा एचआईभी/एड्स न्यूनीकरण तथा सचेतनामूलक पहलहरूका सम्वन्धमा छलफल गरिएको छ ।

अस्तालका निमित्त प्रमुख डा. राजेन्द्र लामासहित अस्पतालका चिकित्सक तथा कर्मचारी एवं सर्वसाधारणको सहभागिता रहेको थियो । अस्पतालका चिकित्सक, स्वास्थ्यकर्मी तथा सरोकारवालाहरूले नुवाकोटमा एचआईभी÷एड्सको वर्तमान अवस्था, रोकथामका उपायहरू, नियमित सेवा उपलब्धता तथा आगामी रणनीतिबारे आ–आफ्नो धारणा व्यक्त गरेका थिए ।

कार्यक्रममा अस्पतालका निर्देशक डा. राजेन्द्र लामाले नुवाकोटमा एचआईभी÷एड्स नियन्त्रणका लागि अस्पतालले सेवा विस्तारलाई निरन्तर प्राथमिकतामा राखेको उल्लेख गरे ।