विश्वमा माेबाइलको माग घट्न थाल्यो

नुवाकोट ।  विश्वमा मोबाइल फोनको माग घट्दै गएको पाइएको छ ।

क्षेत्रीय अनिश्चितता र आर्थिक संकटले मोबाइल फोनको ढुवानी विश्वमा ९ प्रतिशतले घटेको क्यानालिसस नामक संस्थाको पछिल्लो अध्ययनले देखाएको छ । चालु आर्थिक वर्षको दोस्रो त्रैमास (अप्रिल–जुन) सम्मको तथ्यांकमा समग्र मोबाइल फोनको बजार घटेको देखिए पनि आईफोन र सामसङको भने बढिरहेको छ ।

आईफोन १३ को बिक्री सबैभन्दा राम्रो रहेको पाइएको छ । कम्पनीले सेप्टेम्बरमा सार्वजनिक गर्न लागेको आईफोन १४ को बजार अझै उत्साहप्रद हुने अनुमान गरिएको छ ।

आईफोन १४ का चारवटा मोडल बजारमा आउँदै छन् । विश्वभर मोबाइल फोन ढुवानीमा एप्पलको हिस्सा १७ प्रतिशत छ । अघिल्लो आवको यही अवधिमा १४ प्रतिशत हिस्सा थियो । यसपटक आईफोन १३ को माग उच्च रहेको क्यानालिससले जनाएको छ ।

आईफोनको ढुवानी बढेको भएता पनि विश्वभरको मोबाइल फोन बजारमा सामसङको हिस्सा सबैभन्दा बढी २१ प्रतिशत छ । अघिल्लो वर्षभन्दा यसपटक उसकाे बजार ३ प्रतिशतले बढेको हो । आईफोनभन्दा निकै कम मूल्य पर्ने, सस्ता ग्यालेक्सी ए सिरिजका सामसङ फोनको बिक्री मनग्गे हुने गरेको छ । सस्ता फोनले सामसङको बजार हिस्सा सबैभन्दा धेरै बनाउने गरेको हो । साओमी, ओप्पो र भिभोको मार्केट सेयरमा भने निकै ह्रास आएको छ । हालसम्म विश्वमा जम्मा २८ करोड ७५ लाखवटा मोबाइल फोन बिक्री भएका छन् ।

एप्पलले यही जुलाइ २८ मा आफ्नो आय सार्वजनिक गर्दै छ । गत अप्रिलमा एप्पलका प्रमुख वित्त अधिकारी लुका मेइस्त्रीले वितरण प्रणालीमा कम्पनीले चुनौती झेलिरहेको बताएका थिए । तर आईफोन १३ को माग उस्तै रहेकाले यसबाट कम्पनीले राम्रो आम्दानी गरेको हुनुपर्ने बजार विश्लेषकहरूको भनाइ छ ।

बढ्दो मुद्रास्फिति र घट्दो सञ्चितिले नयाँ फोन किन्नेको संख्या वृद्धि हुन गाह्रो रहेको क्यानालिससका टोबी झुले बताएका छन् । वितरण प्रणालीमा देखिएको अवरोधले पनि मोबाइल फोनको बजार संकुचित हुनेतर्फ उनले सचेत गराएका छन् । विज्ञापन र प्रवर्द्धनका साथै छुट र अन्य विशेष अफर ल्याएर अब माग बढाउन सकिने आशा गरिएको छ ।

‘मूल्य वृद्धि, ढुवानी आदिको दबाब खुकुलो हुँदै गए पनि लजिस्टिक र उत्पादनमा समस्या रहनेछ,’ झुले भनेका छन्, ‘कतिपय उदाउँदा बजारले आयात र भन्सारमा कडाइ गर्दा ढुवानी प्रक्रिया पर सरेका छन् ।’ चिनियाँ फोन निर्मातालाई यी समस्याले बढी असर पार्ने अनुमान गरिएको छ । क्यानालिससको प्रारम्भिक तथ्यांकअनुसार साओमी, ओप्पो, भिभोले अहिले नै दोहोरो–अंकको गिरावट भोगिसकेका छन् । तिनको बजार हिस्सा क्रमशः १४ प्रतिशत, १० प्रतिशत र ९ प्रतिशत छ ।