विद्युत् प्रवाह गर्ने तार सार्न नसक्दा स्याफ्रुबेँसी–रसुवागढी खण्डको स्तरोन्नति स्थगित

स्याफ्रुबेँसी–रसुवागढी खण्डको सडक छेउमा रहेका विद्युत् प्रवाह गर्ने तार सार्न नसक्दा सडक स्तरोन्नतिको काम स्थगन भएको छ ।

स्याफ्रुबेँसीदेखि रसुवागढीसम्मको १६ किलोमिटर सञ्चालन भइरहेको अन्तरराष्ट्रिय राजमार्ग दुई लेनको कार्य चीन सरकारको सहयोगमा हुन लागेको र काम गर्न चिनियाँ ठेकेदारसमेत कार्यक्षेत्रमा आइसके पनि सडक छेउमा रहेका विद्युत् लाइन अन्यत्र सार्न ढिलाइ हुँदा राजमार्ग स्तरोन्नति गराउने काम स्थगन भइरहेको गल्छी–त्रिशूली–स्यापु्रmबेँसी–रसुवागढी सडक आयोजनाका प्रमुख नारायणदत्त भण्डारीले बताउनुभयो । दशैँ अगाडि नै टिमुरेको घट्टेखोलामा एक छलफल गरी सडक स्तरोन्नति गर्न जिम्मा पाएको चिनियाँ ठेकेदार कम्पनीले काम गर्न आई सडक विस्तारमा सहज पार्न राजमार्ग छेउका विद्युत् लाइन अन्यत्र स्थानान्तरण गरिदिन आग्रह गरेको थियो । लाइन स्थानान्तरणका लागि नेपाल विद्युत् प्राधिकरण धुञ्चेलाई आग्रह गरिए पनि विद्युत् खम्बा सार्ने प्रक्रिया अगाडि नबढ्दा राजर्माग सुधारमा ढिलाइ भइरहेको आयोजना प्रमुख भण्डारीले जानकारी दिनुभयो । स्याफ्रुबेँसी–रसुवागढी खण्डको विद्युत् लाइन नयाँ विस्तारका लागि प्रक्रियामा जाने कार्य अगाडि बढिसकेको प्राधिकरण धुञ्चेका सहायक प्रशासन अधिकृत विद्यासागर श्रेष्ठले बताउनुभयो ।

रसुवागढीमा निर्माणाधीन १११ मेगावाट विद्युत् आयोजना, रसुवा भन्सार कार्यालय, अध्यागमन र सुरक्षा निकायलाई समेत अहोरात्र आवश्यक पर्ने भए पनि स्याफ्रुबेँसी–रसुवागढी क्षेत्रको विद्युत् लाइन हटाउन नसक्ने बताइएको छ । विद्युत् लाइन सडकमा भएको निहुँमा चिनियाँ ठेकेदार कम्पनीलाई काम पर सार्न सहज भएको तर विस्फोटक पदार्थको प्रयोगबाहेक अन्य काम गर्न कुनै समस्या नहुने स्थानीयवासीले बताएका छन् । यसैगरी स्याफ्रुबेँसीदेखि मैलुङ खण्डमा नेपाली सेनाले निर्माण गरी सडक सुधार आयोजनालाई हस्तान्तरण गरेको १७ किमी नयाँ ट्र्याकको व्यवस्थापन गराउने कार्य अन्तिम चरणमा पुगेको छ । गल्छी–त्रिशूली–स्याफ्रुबेँसी–रसुवागढी सडक विस्तार आयोजना प्रमुख भण्डारीका अनुसार निर्माण व्यवसायी छनोट गर्ने प्रक्रिया अन्तिम चरणमा पुगेकाले अबको दुई महिनाभित्र स्थलगतरूपमा राजमार्ग सुधारका काम शुरु हुने छ ।

स्याफ्रुबेँसी–मैलुङ खण्डमा नयाँ मार्गका छेउ एवं कुनामा टेवा पर्खाल लगाउने, नाली निर्माण गर्ने, सडक सतह मिलाई ग्राभेल तथा कालोपत्रेसमेतका काम अगाडि बढेपछि नयाँ मार्गमा ओहोरदोहोर गर्ने सवारी साधन गुडाउन बन्द हुने र सबैखाले सवारी साधन साविक बेत्रावती–धुञ्चेतर्फको पासाङल्हामु राजमार्गतर्फ जानुपर्नेसमेत आयोजना प्रमुख भण्डारीले जानकारी दिनुभयो । राजमार्ग सुधारका लागि बोलपत्र प्रक्रिया पूरा भएको लामो समय बितिसक्दा पनि त्रिशूली नदी तथा साना खोल्छाको निर्माण पुल तथा कल्भर्ट निर्माण व्यवसायीले अझै अगाडि बढाएका छैनन् । कालिका टुटी हिण्डुङ एण्ड थोकर जेभीले करिब रु ६० करोडमा सानाठूला ११ पुल निर्माणको जिम्मा लिएको निर्माण व्यवसायीको प्रबन्धक निर्देशक आयोजनाले जनाएको छ ।