किस्पाङको बजेट ४३ करोड ८३ लाख ३३ हजार

नुवाकोट । नुवाकोटको किस्पाङ गाउँपालिकाले आगामी आर्थिक वर्ष २०८३/०८४ का लागि ४३ करोड ८३ लाख ३३ हजार ३ सय रुपैयाँको बजेट सार्वजनिक गरेको छ ।

१८ औँ गाउँसभाको अधिवेशनमा बुधबार कार्यवाहक अध्यक्ष अर्जुनप्रसाद न्यौपानेले बजेट प्रस्तुत गरेका हुन् ।

किस्पाङ गाउँपालिकाले आन्तरिक स्रोत, संघीय र प्रदेश सरकारबाट प्राप्त हुने राजस्व बाँडफाँट, विभिन्न अनुदान र चालु वर्षको बैंक मौज्दातबाट व्यवस्थापन हुने गरी आ.व. २०८३/८४ का लागि ४३ करोड ८३ लाख ३३ हजार ३ सयको बजेट विनियोजन गरिएको न्यौपानेले बताए ।

प्रस्तुत बजेटमध्ये चालु खर्चतर्फ २९ करोड ८१ लाख ८६ हजार रुपैयाँ विनियोजन गरिएको छ भने पुँजीगत खर्चतर्फ १४ करोड १ लाख ४७ हजार रुपैयाँ छुट्टाइएको छ ।

कार्यावाहक अध्यक्ष न्यौपानेले प्रस्तुत गर्नुभएको आगामी आर्थिक वर्ष २०८३/८४ नीति तथा कार्यक्रम अनुमानित आय–व्यय सहितको बजेट, योजना तथा कार्यक्रम गाउँसभाबाट सर्वसम्मत रूपमा अनुमोदन भएको छ ।

कार्यावाहक अध्यक्ष न्यौपानेले प्रस्तुत गरेको निति तथा कार्यक्रममा उद्यमशिलताको विकास मार्फत रोगजारी सृजना गर्दै किस्पाङ गाउँपालिकाको आन्तरिक आयमा वृद्धि गर्दै आत्मनिर्भर किस्पाङ निर्माण गर्नु अवको मुख्य अभिभारा रहेको उल्लेख गरिएको छ ।

निति तथा कार्यक्रम र बजेटमा किस्पाङले कृषि स्वास्थ्य, वन तथा वातावरण, शिक्षा, स्वास्थ्य, खेलकुद र पर्यटनलाई मुख्य प्राथमिकतामा राखेको छ ।