नगरप्रमुख श्रेष्ठद्धारा कोलनी ब्याडमिन्टनको कर्भड हल उद्घाटन

नुवाकोट । विदुर नगरपालिका वडा नम्बर ९ मा निर्माण गरिएको कोलनी ब्याडमिन्टनको कर्भड हलको उद्घाटन गरिएको छ ।

शनिवार विदुर नगरपालिकाका मेयर राजन श्रेष्ठले सो कर्भड हलको उद्घाटन गरेका छन् । विदुर नगरपालिकाको २५ लाख रुपैयाँको लागतमा निर्माण गरिएको कर्भड हलमा एकैपटक दुई खेल संचालन गर्न सकिने छ ।

कर्भड हलको उद्घाटन गर्दै मेयर श्रेष्ठले खेल पर्यटनकोे प्रचुर सम्भावना बोकेको नुवाकोटमा कर्भड हलको निर्माणले खेल क्षेत्रको संस्थागत विकाशमा महत्वपूर्ण योगदान पुग्ने बताए । उनले नगरपालिकाद्वारा निर्माण भएको कभर्ड हलको ब्याबस्थापन र संरक्षण सबैको दायित्व रहेको बताए ।

मेयर श्रेष्ठले नगरपालिकाले सबै खेल क्षेत्रलाई प्राथमिकता दिएर बजेट बिनियोजन गरिरहेको बताए । उनले निर्माण भएको कर्भड हलमा बाँकी रहेको संरचना गर्न थप आवश्यक सहयोग गर्ने प्रतिवद्धता व्यक्त गरे ।

कार्यक्रममा जिल्ला खेलकुद विकास समितिका अध्यक्ष विजय गुरुङले पछिल्लो समय नुवाकोटमा प्रदेशदेखि नगरपालिका सम्मले खेलकुदमा बढी बजेट विनियोजन गरेको भन्दै खुशी व्यक्त गरे ।

उनले नुवाकोटमा हरेक शनिवार कुनै न कुनै खेलकृुद प्रतियोगिता मनाउने तयारी गरेको बताए । अध्यक्ष गुरुङले नुवाकोटमा खेल क्षेत्रमा धेरै लगानी भएपनि खेलाडी उत्पादन नभएको बताए । अवको दिनमा खेलाडी उत्पादन गर्न सबै सरोकारवालाहरु लाग्नुपर्ने उनले बताए ।

कार्यक्रममा विभिन्न सरोकारवाला व्यक्तिहरुको उपस्थिति रहेको थियो ।