नक्कली लाइसेन्स बनाएको आरोपमा नुवाकोटका २ जना पक्राउ

नुवाकोट । नक्कली सवारी चालक अनुमतिपत्र (लाइसेन्स) बनाएको आरोपमा नुवाकोटका २ जनासहित ३ जनालाई प्रहरीले पक्राउ गरेको छ ।

पक्राउ पर्नेमा नुवाकोटको लिखु गाउँपालिका वडा नम्बर ४ चौघडा घर भई हाल टोखा बस्‍ने ३८ वर्षीय अनिल राई र चौघडा नै घर भई हाल तारकेश्वर बस्‍दै आएका ३६ वर्षीय राजन तामाङ रहेका छन् ।

यस्तै पक्राउ पर्ने अन्य एक जनामा पोखरा महानगर–१ कास्की घर भई हाल नखीपोट बस्‍ने ३४ वर्षीया कञ्चन गुरूङ रहेका छन् ।

काठमाडौं उपत्यका अपराध अनुसन्धान कार्यालयको टोलीले राईलाई सामाखुसी , तामाङलाई बालाजु पेयाँटारबाट र गुरूङलाई रामशाहपथबाट पक्राउ गरेको हो ।

घटनाको विषयमा अनुसन्धान जारी रहेको प्रहरीले जनाएको छ ।