नुवाकोटले संघिय सरकारबाट ३ अर्ब ४४ करोड अनुदान पाउने

विदुर खबर २०७७ जेठ १६ गते १५:३२

नुवाकोट । संघीय सरकारले आगामी आर्थिक वर्ष २०७७/०७८ का लागि नुवाकोटका १२ स्थानीय तहलाई ३ अर्ब ४४ करोड रूपैयाँ अनुदान उपलब्ध गराउने भएको छ।

अर्थ मन्त्रालयका अनुसार त्यसमध्ये १० गाउँपालिकाले २ अर्ब ४८ करोड र २ नगरपालिकाले ९६ करोड १४ लाख रूपैयाँ अनुदान पाउने भएका छन्।

संघीय सरकारबाट विदूर नगरपालिकाले ५२ करोड ९४ लाख रूपैयाँ अनुदान पाउनेछ। यसैगरी बेलकोटगढी नगरपालिकाले ४३ करोड १२ लाख रूपैयाँ अनुदान पाउनेछ। त्यसैगरी ककनी गाउँपालिकाले ३० करोड ६८ लाख रूपैयाँ, किस्पाङ गाउँपालिकाले २३ करोड १६ लाख रूपैयाँ, तादी गाउँपालिकाले २२ करोड ८ लाख रूपैयाँ, दुप्चेश्वर गाउँपालिकाले २६ करोड ७१ लाख रूपैयाँ र पञ्चकन्या गाउँपालिकाले २२ करोड २९ लाख रूपैयाँ अनुदान पाउनेछन्। पञ्चकन्या गाउँपालिकाले वित्तीय समानीकरण अनुदानबापत ७ करोड ७८ लाख, सशर्त अनुदानबापत १३ करोड ७ लाख र विशेष अनुदानबापत १ करोड ४० लाख रूपैयाँ पाउनेछ।

यस्तै मेघाङ गाउँपालिकाले २० करोड ५५ लाख रूपैयाँ, लिखु गाउँपालिकाले २३ करोड ८६ लाख रूपैयाँ, शिवपुरी गाउँपालिकाले ३२ करोड २ लाख रूपैयाँ, सूर्यगढी गाउँपालिकाले २३ करोड ७८ लाख रूपैयाँ र तारकेश्वर गाउँपालिकाले २२ करोड ८ लाख रूपैयाँ पाउनेछन्।