जबर्जस्ती फोटो खिच्न लगाई दुःख दिने नुवाकाेटका तीनजना पक्राउ

नुवाकाेट । प्रहरीले काठमाडौं महानगरपालिका–१५ स्वयम्भू स्तूप घुम्न आउने पर्यटकलाई जबर्जस्ती फोटो खिच्न लगाई बढी पैसा लिएर अनावश्यक हैरानी दिएको आरोपमा नुवाकाेटका तीनजनासिहत ६ जना पक्राउ परेका छन् ।

पक्राउ पर्नेमा नुवाकाेटकाे विदुर ४ घर भइ हाल नागार्जुन नगरपालिका–३ बस्ने टाइसन तामाङ, ककनी गाउँपालिका–१ घर भई नागार्जुन बस्ने सुवास तामाङ र तारकेश्वर गाउँपालिका–१५ घर भई नागार्जुन बस्ने समिर तामाङ रहेका छन् ।

त्यस्तै पक्राउ पर्ने अन्यमा धादिङकाे धुनिबेँशी गाउँपालिका–७ घर भई काठमाडौं महानगरपालिका–१५ बस्ने कौशल तामाङ, सुनकोशी गाउँपालिका–१ घर भई नागार्जुन बस्ने सुक्चेन तामाङ र काभ्रेपलाञ्चोक, धुलिखेल नगरपालिका–११ घर भई बुढानिलकण्ठ बस्ने रोहित गौतम छन् ।

प्रहरीका अनुसार उनीहरूलाई अभद्र व्यवहार कसुरमा जिल्ला प्रशासन कार्यालय काठमाडौंबाट ५ दिनको म्याद थप अनुमति लिई थप अनुसन्धान भइरहेको छ ।